١٧‏/١٢‏/٢٠٠٦

انا بحب مدونتى..



فى خلال وقت قصير وكام تدوينة او كام فضفضة لاقت نفسى بحب مدونتى دى اوى..فعلا اتعلقت بيها جامد..دايما احب ابص عليها حتى وانا متاكد ان مفيش جديد بس مش عارف..حسيت انها حتة منى..يمكن زى بنتى ..بالظبط كدة حاسس انها بنتى..

يمكن اول حاجة خلتنى افكر ادون خواطرى دى هى الوحدة والوحدانيه وكل ما يشتق من لفظة الوحدة اللى انا عايش فيها من زمان..فجأة كدة خت بالى ان عمرى جرى واتسرق منى..اصحابى كلهم (معظمهم)اتجوزا ومعظم هذا المعظم بقى عندهم اولاد وبنات تشغلهم حتى عن نفسهم.. المهم مبقاش فى حد اتكلم معاه عن اللى جوايا ومخافش منه ..مخافش انه يفهمنى غلط او حتى مخافش انه يفهمنى صح!! ..

عاوز اتكلم واصرخ بكل اللى جوايا…مش عاوز اخاف من مشاعرى وافكارى مهما كانت غريبة او عنيفة او رقيقة او متطرفة فىنظر غيرى اللى يمكن مر بظروف غير ظروفى وحياته مستقرة ..(من الاخر مش سايكو زى)

فى الاول كنت عاوز اتشهر (جاى من الشهرة) ويكون لى اصحاب كتير وناس تتابعنى وتحسسنى انى حاجة..شوية شوية لقيت نفسى مش بحاول اجمل كلامى ولا بحاول افلتر افكارى..وشوية شوية لاقتنى صادق اوى مع نفسى هنا..هنا هلاقى نفسى الحقيقية بدون رتوش ولا تجميل ولا اصطناع..بقت هى مرايتى مهما كان شكلها..المهم انها مرايتى انا…بقت صاحبتى وحبيبتى اللى حلمت طول عمرى بيها ومالقتهاش.

ملخص لكل العك والجنان اللى فات:

عرفتى دلوقتى انا بحبك ليه.؟
بحبك لانك شبهى..
بحبك لانك بتصدقينى..
بحبك لانى مابخفش منك..
وبحبك لانك مابتخفيش منى..
بحبك لانى بتفهمينى..
بحبك لاتك عارفه اللى عاوز اقوله من غير ماتكلم..
واهم حاجة..انى بحبك لانى مليش غيرك..

هناك تعليقان (٢):

غازى يقول...

ايه ده ... تيتانيك يا واد
ولا ليوناردو دى كابريو يعمل كده ...
المهم ... هلى هى كمان بتحبك ؟؟؟
خلى بالك .. السيرفرات ليها ودان
اظنك فاهمنى
وبكرة حبيبتك .. تكسر رقبتك

غير معرف يقول...

مودونتكـ / عجبتني آوي
بتمنى لك التوفيق في حياتك
ودوام الصحة