10‏/04‏/2007

صفحة جديدة




صفحة جديدة من حياتى ابتدت.. ودة اللى مكتوب فيها..

تعريفات ..
سرعة الضوء:
هى السرعة اللى كنت بحاول اسبقها بعينى بعملية انسحاب سريعة قبل هجوم الضوء اللى كان عاوز يفضحنى ويكشف لها انى كنت ببص عليها.
الجنة:
هى تللك المكان الذى يحده من الشمال اى حاجة ومن الجنوب مش هاتفرق ومن الشرق ولا تاخد فى بالك اما من الغرب فاى حاجة مكررة من اللى فات.. المهم انها بتكون موجودة فى المكان دة.
الانتقال الانى:
هى انتقال الانسان من الجنة الى النار او العكس بكلمة او بنظرة من حبيبته.
الدورة الدموية:
هى تلك الدورة التى تمسك هى بصافرة البداية والنهاية فيها .. يمكنها ايقافها بالمرة فيكون الموت نتيجة حتمية او ابطائها فتصاب بهبوط حاد او تسريعها حتى يتم اعلان اصابتك بجلطة كنتيجة نهائية.
--------------------------------------------------------------

كنت عاوز اقولك بحبك قد ايه.. بس اكتشفت كم هى حمقاء وجوفاء وناقصة كل تلك الكلمات التى تملئ قواميس اللغة.
فكرت استدعى ارواح اكثر شعراء الرومانسية والغرام موهبه وحرفة وتمكن عشان يروح ويجى فى كل قواميس ومعاجم اللغة فى محاولة يائسة منه ومنى لاعادة ترتيب تلك الكلمات وجعلها قادرة على وصف مشاعرى.
مش لاقيت فى الاخر غير ابيات محمود درويش اللى بيعانى فيها من نفس مشكلتى

آه.. هل أدركت قبل اليوم
أن الحرف في القاموس، يا حبي، بليد
كيف تحيا كلّ هذي الكلمات!
كيف تنمو؟.. كيف تكبر؟

وفى الاخر لاقيت الكلمة
انا بحبك اووووى



هناك 41 تعليقًا:

halwasa-masrya يقول...

طارق .. انا مبسوطة عشانك بجد اوى .. ربنا يديم عليك اللون الروز فى كتاباتك ومترجعش تتضايق تانى ..
ان شاء الله كل حاجة خير .. وبجد اسمع نصيحتى و اكيد انت فاكراها كويس وكل حاجة هتبقى تمام

اختك الصغيرة :)

واحد من الناس::طارق:: يقول...

نانا ... ازيك.. انا عارف انك اكتر واحدة ممكن ترحيلى ...لاننا اخوات اوى وقريبين اوى
محتاج اختى الكبيرة دايما جنبى ... بذات دلوقتى

halwasa-masrya يقول...

لاء ياااا طارق باه ... اومال لو مكنتش انت اكبر منى ب تلات اربع سنين .. كانى زمانك بتقلى ايه ... هههههههههه يا ماما

yasmina يقول...

هو الحب حلو عموما
يا رب يديم عليك السعادة

غير معرف يقول...

طااااااااااااااارق

انت وهمي
وبجد عبقري

بجد عاجزة ان ارد علي كلامك
لانه كان مفاجئة ليا انا شخصيا
حبيبي انا والله بحبك اووووي
سرعه الضوء
هي السرعه التي تخترق حياتي فتنير لي دروبي بنظرة منك انت
نظرتك هي نوري
الجنة
هي ذلك المكان الاسطوري الذي اشعر ان جميع من حولنا صاروا سراب ولا يتواجد غير انا وانت في تلك الجنة
الانتقال الاني
وهو الانتقال من جحيمي الي جنتك ايها الملاك الحارس
الدورة الدموية
هي تلك الدورة الي يتحكم بها قلبك
فيضخ دمائي لتصل الي الحياة
حبيبي
انت مش محتاج انك تقولي انت بتحبني اد ايه
اي نعم كنت غبية ومش كنت فاهمة من الاول بعيد عنك نقص حقن
بس بجد حاسة بيك
وكفاية انك معايا
وانا عارفة انت كاتب الكلام دة ليه
عشان مش تخليني اخد منك الصلصة تاني صح
بس بجد كلمة احبك غير قادرة علي وصف مشاعري ليك
ربنا يخليك ليا يااااااااااااارب
وعقبال يوم فرحنا ياااااارب
ومش قادرة اقولك انا بحبك اااااااااااااااااد ايه
ياريت الناس تدعيلنا ان ربنا يتمم لينا بخير
يا اطيب واحن وانضف قلب قابلته في حياتي
بحبك اووووووووووي
ربنا يجمعنا في الخير يارب
امضاء
حبيبتك اللي عايشة بيك

ياسمين يقول...

ايه الحلاوة دى
الحب حلو مش كدة
سعيدة جدا عشانك

reri يقول...

يا نهار أبيض علي الرومانسيه يا طارق إيه ده كله؟؟؟؟؟؟
وما كنتش عايز تنطق؟؟؟؟؟
أنا فرحانه أوي ... مش عارفه ليه... مع إني ما أعرفكش... أنا شخصيا بحب أشوف الحب وبحب أي إتنين بيحبوا بعض..الحب فعلا ده أجمل حاجه في الدنيا... ربنا يسعدك...ويخرجك من وحدتك
بس إسلوبها زي إسلوبك يا طارق... يمكن الحب مخلي إسلوبكوا واحد...إوعي تكون
إنت اللي كاتب التعليق
علي العموم لو هي يبقي ربنا يسعدك ...وإدعيلي ألاقي حد أحبه ويحبني الحب ده كله...طولت عليك

سلاااااااااااامي ليك يا طارق ولحبيبتك اللي عايشه بيك

غير معرف يقول...

riri

مش عارفة اقولك ايه
بس بجد تعليقك اسعدني جدا
وياسيتي انا فعلا واحدة بتحب طارق جدا ومش تخافي انا اللي كاتبة التعليق مش هو
وبجد فرحتيني اوي لما قلتي ان اسلوبي زي اسلوب طارق
وجايز زي مانتي قلتي ان الحب اللي بينا خلانا تقريبا نفكر بطريقة واحدة ونحس ببعض اكتر وتبقي مشاعرنا واحدة


طارق انت غيرت فيا حاجات كتير
وبجد بحبك جدا
ربنا يخليك ليا يا قلبي

واحد من الناس::طارق:: يقول...

yasmina...
يسمع منك ربنا

ياسمين...
متشكر جدا يا ياسمين .. هو حلو اه ..بس برضو فى شوية خوف وقلق.. بس ربنا يستر

reri..
احلى كومنت .. عجبنى اوى وعجبها كمان ..
على فكرة انا سايكو صحيح ومليان امراض نفسية بس مش لدرجة انى اكتب كدة لنفسى .. هههههه
وربنا يكرمك ان شاء الله وتلاقيه

غير معرف يقول...

ههههههههههه

حبيبي بجد مش معقولة نكون انا وانت كاتبين تعلقيات في نفس اللحظة وفي نفس الوقت
بجد مش ممكن

دة اسمه ايه بقي
عارف احيانا لما بقعد افكر فيك الاقيك انت بتكلمني

حاساك اوي
بقينا شايفين بعض واحنا مش بعض
وانت اصلا معايا علي طول

ويا حبيبي مش تخاف ولا تقلق
ان شاء الله ربنا هيكرمنا
عشان احنا ناوين خير يا حبيبي

وبجد توارد الافكار اللي بينا دة بقي غريب
بس مش غريب لان احساسنا بقي واحد
مشاعرنا بقت واحدة
حتي ريري قالت ان اسلوبنا بقي واحد
تعشق كلماتي
وكلماتي ذابت حنينا لملاقاة حبك
وزي ما قلت مش ادامي غير اني اقدملك قلبي
واني اقولك انا بحبك

reri يقول...

هههههههههههههههههههههه
خلاااااااااااااااص إتأكدت إنك مش إنت اللي كاتب التعليق... ربنا يسعدكوا يا رب...ومفيش حد يقلق يا طارق ما دام في حد بيحبه كده ...الحب يعني الأمان...ولا إيه يا حبيبة طارق... إسمحيلي إنتي وطارق إني أدخل كل شويه المدونه وأقرأ اللي بتكتبيه لطارق أو اللي بيكتبه ليكي... هبقي متطفله...ههههههه... بس مش مشكله

و برده سلامي يا طارق ليك ولحبيبتك اللي عايشه بيك

واحد من الناس::طارق:: يقول...

reri ..
ياسيتى انتى تنور فى اى وقت ...
بجد

أبو ضحى يقول...
أزال المؤلف هذا التعليق.
أبو ضحى يقول...

طارق

الحب جميل
ربنا يديمه عليك نعمة
و يحفظها من الزوال

تحياتى

واحد من الناس::طارق:: يقول...

ابو ضحى الجميل..
مسحت تعليقك الاولانى ليه ؟ انا قريته ومش شايق حاجة تخليك تلغيه.
بس على العموم انت منورنى

halwasa-masrya يقول...

حبيبة طارق ... اعملى حسابك انى هبقى حماتك
ربنا يوفقكم يا رب ويجمعكم فى الدنيا على خير

ويتتملكم على كل خير واجى اشرب شرباتكم فى بيتكم

مصر هى أمى يقول...

ماشى
يا طارق بتمسح التعليق بتاعى ماشى متشكرين يا سيدى بعد ما عرفتكوا ببعض وانا اللى قلتلك على حبيبتك يبقى ده جزائى على العموم شكرا اوى
انت كده مبقتش محتاجلى تانى خلاص لقيت حد تكلمه من ورايا على الشات
على العموم ربنا يسعدك وفرحتلك اوى

وهلوسة هتبى حماة مراتك وانا هبقى حماك وحماها ما انا اللى معرفكوا
كويس انك سمعت نصيحتى وغيرت الكومنت بتاعها لاسم مجهول على الاقل فى الفترة الاولى ومتنساش انا اللى هاشهد على عقد جوازكم ولا مش ناويين تعزمونى

عقباااااااااااااااالى

غير معرف يقول...

ههههههههههههه

هلوسة

طبعا ياهلوسة انا يا ستي موافقة انك تكوني حماتي
واكيد غصب عنك هتبقي تيجي تشرفينا في بيتنا
وتقعدي وهنبقي اصحاب كمان
خصوصا اني عرفت ان سننا زي بعض تقريبا

ههههههههههههههه

محمد يا عادل مش عايزين تشريد
عارف انا موافقة تكون حمايا عشان هتخليني اكل
وهتعرفني اماكن الاكل مانت عارف اكلتي ضعيفة ههههههههه

طبعا هنعزمك اومال مين اللي هيرقصلنا في الفرح
حاكم طارق مش بيعرف
نبقي نديها انا وانت بقي
عشان طارق يخلص مني
ههههههههههه

ويارب تلاقي اللي بتدور عليه يارب
وبعدين بطل تذل فينا بقي ان انت السبب في تعارفنا
هو مش في خير في ام البلد دي
هههههههههههه


ريري
يا ستي تعالي في اي وقت منورانا
وبعدين اعتبري البلوج بلوجك
ولو طارق اعترض سيبك منه
ههههههههه
ربنا يكرمك يارب ويرزقك بكل خير

اشطه يا برنس يقول...

السلام عليكم
ايه يا باشا الانوار دي والكلام الجميل ده طبعا انا كلامي متاخر بس انت اكيد متعرفش ليه انا مش بدخل علي النت
بس بردو مكنش ينفع مردش علي البوست ده
اخوك الصغير حلاوه
انا مين ؟

أبو ضحى يقول...

عزيزى طارق
أنا مسحت التعليق الاولانى لأنى كنت كاتب حاجة زى:"يا ريت الإنسانة صاحبة البوست ده تكون حاسة بالمشاعر الجميلة دى" و بعدين لما قريت تعليقات الاخرين و ردودك وجدت ان الكلمتين دول مش فى مكانهن فقلت اغير الكومنت

تحياتى
و متبقاش تبخل علينا ببوستات جميلة و متتأخرش كده

أبو ضحى يقول...

و بعدين ايه الحاجات و الكلام الجميل ده كله اللى من حظك
يا بختك يا عم

ساعه الغروب يقول...

طارق بجد انت حد يستاهل كل خير

انا فرحانلكو اوى اوى

المجهوله العزيزه

ربنا يتمم لكو على الف خير

انا عازمه نفسى عنكو كدا بدون استئذان

بحبكو اوى وفرحانالكو اوى اوى اوى

ربنا يهنيكو ا ويكتب لكو كل خير

ويبعد عنكو اى عين مش بتتمنالكو الخير

ربنا يوفقكو و يقدركو تسعدوا بعض دايما

سلام وربنا معاكو

:)

رودى اختكو

:)

واحد من الناس::طارق:: يقول...

نانا..
انتى اكيد هاتبقى حماتها .. عشان انتى اختى الكبيرة الحنينة اوى..

محمد ..
معلش والله يا حبيبى ...انا اتصلت بيك وفهمتك الموقف..
وانت عارف انى ماقدرش استغنى عنك ...بجد
وان شاء الله ربنا يكرمك وتلاقيها ... اللى خلانى انا لاقيتها يبقى انت مش هتلاقيها

حبيبة قلبى ..
"واطى صوتك يا غبى لايعرفوا مكانك"
"حاضر يا فندم"

ابو ضحى الجميل..
ربنا يكرمك يا باشا.. وفعلا يا بختى

رضوى..
يا ستى ربنا يكرمك.. وربنا يروق بالك كدة .. وان شاء الله مرحلة وتعدى

عبدالله يقول...

:)
الف مبروك يا مان انت شخصيه جميله تستحق شخصيه رائعه
عاوزين نسمع اخبار جميله قريب
تحياتي

hosnysoliman يقول...

طارق
الحمد لله ان البلوج الجديد والشغل الجديد والحب الجديد ملى حياتك
طارق انت جواك عبقرية اوعى تخزنها تانى بلاش انانيه متعنا واسعدنا معاك

Sampateek يقول...

ربنا يسعدك دايما

واحد من الناس::طارق:: يقول...

عبد الله..
ربنا يكرمك يا جميل .. الله يبارك وعقبالك

استاذ حسنى..
وااله منورنى ..انا مبسوووووط اوى ان حضرتك لسة بتيجى تزورنى.
ربنا يخليك يا استاذى على الكلام الجميل دة.. بجد فرق معايا كتيييير

sampateek
ويسعدك انتى كمان يا رب ..

خمسة فضفضة يقول...

السلام عليكم ورحمة الله وبركاته

ربنا يوفقك ويسعدك يا طارق
وان شاء الله حياتك انت وهي تبقي بمبي بمبي بمبي

وعموما انا حاسه اني عرفت هي مين ، هو مجرد تخمين بس مش هقول عليها ،
مش هي برضو ليها مدونه قريبه من هنا ...ههههه

ربنا يسعدكم يارب ، وماتنسوش تعزموني علي الفرح

bastokka طهقانة يقول...

كان بدري عليك


الكورال


عليك بدري

ibn nasser- ابن ناصر يقول...

يا رب يخليك سعيد أحسن ويا ريت ماتجيش عندي للبلوج عندي عشان انا عامل موضوععن العراق بيعكنن اي حد..حفاظا علي مشاعرك ...
تحياتي

raspoutine يقول...

جميل اوى
تحياتى ليك على اسلوبك البسيك اللى بسهولة بيوصل

ايمن

smraa alnil يقول...
أزال المؤلف هذا التعليق.
غير معرف يقول...

حبيبي

حبيت اقولك بجد اني بحبك اوووووووووي
واني مش قادرة استغني عنك

ربنا يخليك ليا

ويارب يتمم لينا علي خير

حبيبتك اللي عايشة بيك وليك

Tamer Nabil يقول...

بوست مميز


ا الدنيا دى فيها وفيها وعايزين مجلدات عشان نعرف نقول ونفهم فيها


والحب فيها اجمل حاجة لانة الاساس وبدونة لاحياة

تحياتى

واحد من الناس::طارق:: يقول...

اسف على التاخير..

خمسة فضفضة..
وعليكم السلام ورحمة الله وبركاته
ربنا يخليكى يا رب على الدعوات الحلوة دى اللى محتاجنها اوى.
ايوة يا ستى هى اللى عندها مدونة قريبة دى ... سيبى اول سرفر وخشى يمين .

طهقانة..
وااله هو مش بدرى اوى يعنى .. بالعكس دة متاخر اوى.

ابن ناصر ..
ربنا يكرمك يا رب ويسمع منك
بس انا خلاص دخلت عندك ومن بدرى كمان .. ماتخفش العكننة دى جزء منى لاننا مش هانهرب من واقعنا يعنى .

ايمن باشا..
ربنا يخليك ونورتنى

tamer nabil
متشكر يا باشا على الزيارة وعلى الكلام الجميل دة

واحد من الناس::طارق:: يقول...

حبيب عمرى وايامى وسنينى..
انا قولتلك انى دلوقتى بتنفسك ..فاهمة يعنى ايه .. يعنى انتى جوايا وقدامى وحواليا فى كل وقت
عارفة يا ماما... كتير اوى بخاف من بكرة عشان حاسس انك كتير اوى على .. بجد انتى جميلة اوى من برة ومن جوا ..وانا شايفك اوى من جوا
حبيبتى ..معلش استحملينى شوية ..انتى عارفة انى مليش غيرك

Amr Ahmed يقول...

لالالالا

انا زعلان منك بجد
انت مبتسالش علي اخوك الصغير

ماشي ياعم هفوتها علشان خاطر التجربة الجديدة

وربنا معاك ويوفقك

وعقبال الخطوبة والجواز
واوعي متعزمنيش

تحياتي يا مان

دماغ ماك يقول...

mabrook ya 3am 3ala el blog el geded

Amany يقول...

حلواوى وربنا يديم عليك السعادة

محض روح يقول...

جو من الرومانسيه
ربنا يكملك على خير ياااااااااارب انته والمجهول
الى حسه اني عرفاه
:)
هههههههههههه
ولو هو الي في بالي
يبقى ممتك دعايلك بجد
ربنا معاكم

صور مشبات رخام وحجر روعه وحديثه 0508146146 يقول...

السلام عليكم

جزاك الله خيرا اخى على الموضوع الجميل
نفعنا الله واياك بكل خير ونفع بنا العباد

تحياتى لجهدك الطيب
صور مشبات
http://shomane.blogspot.com/

http://mchabat.3abber.com