٢٨‏/٠٧‏/٢٠٠٩

حنين جت

بس خلاص

١٦‏/١٠‏/٢٠٠٧

وراياتى التى طويت



مازلت رافعاً رايتى حتى تتبعينى الى تلك الجنة المنشودة.. الى ذلك البيت الذى طالما تخيلناه وعشنا فيه واسسناه شبراً شبراً حتى كنا نراه رؤى العين .. اعرف طريقى الى البيت واحتمله بكل صعابه وسخافاته ومهازله .. لا ازيغ عنه ولا احيد.

اوووووووووووعى تقولى انك فكرتى في اوووووووووووووووعى.
قولى انك فكرتى فى تغيرات المناخ على سطح الكرة الارضية وتأثيرتها المحتملة على انقراض بعض النباتات الاستوائية .. فكان قرارك كدة.
قولى انك فكرتى فى احتمال شن امريكا حرب على ايران واتساع دايرة العنف فى المنطقة .. فكان قرارك كدة.
قولى اى حاجة غير انك فكرتى في أو حتى افتكرتينى .. مستعد اصدق ان عشان مصلحة المناخ والنباتات الاستوائية وعشان امريكا وعشان ايران .. كان قرارك كدة .
ماهو مش ممكن ولا منطقى انك خايفة على لاحد يجرحنى بسكينة فتاخدى انتى منه السكينة وتغرزيها فى قلبى وتدبحينى كدة عشان مايقدرش يجرحنى تانى ... ممكن دة ؟؟؟؟؟؟؟ متهايئلى تفسير النباتات الاستوائية اوقع بكتييييييير.
عارف انى هاقدر ارجعك لحضنى تانى..
متأكد ؟ لا .. مش بقيت متاكد من اى حاجة.
عارفة لما ترجعيلى هاكمل معاكى حياتى واحلامى بس هافضل طول عمرى قلبى بينزف.

عودى الي سريعاً قبل ان اصلب على راياتى التى طويت.

٠٦‏/٠٨‏/٢٠٠٧

الموت



الموت
المهندس الشاب زميلى فى الشغل معدى على الورشة زى ما بعدى انا كل يوم .بيعدى بين تلك الكيانات العملاقة المتحركة هنا وهناك بنفس الطريقة اللى بعدى بيها انا..لكن المرة دى الاتوبيس اللى راجع لوراء مكنش فيه فرامل .. دهس زميلى الشاب فى الحيطة. مات فى الحال.. انتهت حياته خلاص فى يوم عادى جدا ومن غير مقدمات .

...........................................


قرر العودة الى حياته الاصلية التى يتقنها وتتقنه.. التى يعرفها وتعرفه ..يعرف كل منها كم يتلائم مع الاخر..
قرر ان يذهب الى عمله يوميا وان يعبر ذلك الطريق السريع القاتل بطبعه ..لعل الطريق يقوم بعمله الذى يتقنه كل يوم ويختاره هو.
يعبر الطريق بعد ان فشل الاخير فى القيام بالشئ الوحيد الذى يجيده..
قرر ان يقتل نفسه عملا.. لا راحة ..المزيد والمزيد من العمل ..لن يغادر العمل حتى يدرك انه لو يعد قادر على ان يتحرك من مكانه.
قرر الموت سهرا ونوما وعملا .. عاد اليه وجهه العابس الشاحب المتبلد الخالى من مشاعر فلم تعد خارطة العالم تعنيه.

لم يعد يعرف
مبقاش عارف هو مين بالظبط..طول عمره عارف انه غير صالح للاستخدام الادمى ..لازم يعيش لوحده ..محدش هايستوعبه.. مبقاش عارف هل هو الملاك الرقيق اللى متطلعش منها العيبة ..ولا هو الشيطان الحقير اللى ملعون فى كل كتاب .

سألت نفسى كتير..مارستش يوم على بر
انا اللى فى الخير ولا اللى فى الشر
مليان عيوب ولا..
خالى من الذنوب ولا..
ولا انا جواى ومش دارى الاتنين فى بعض
و 500 حاجة وملهمش دعوة ببعض




٠٧‏/٠٧‏/٢٠٠٧

كل سنة وانت طيب وعبيط



عارف لما تبقى شايف نفسك طول عمرك بطريقة معينة وتكتشف ان معظم اللى حواليك واقربهم اليك (المفروض يعنى) شايفنك حاجبة تانية خالص... شايفين حاجات مش فيك .. ومش شايفين حاجاات كتير فيك.
افتكرت الموضوع دة بمناسبة عيد ميلادى النهاردة .. افتكرت اد ايه كل سنة كانت بتعدى على بتمنى فيها انى امشى من هنا .. وهنا دى تطلع اى حاجة ..تطلع البيت او البلد او الدنيا كلها المهم انى امشى .. امشى من وسط ناس حاسس انهم اغراب اوى عنى او انا غريب عنهم .. مش زى ولا انا زيهم ... مش شايفنى خالص ولو شافونى بيشوفونى بالمقلوب.
"بطل بقى الطيبة والخيابة دى"... "بقولك ايه فقولى بق كدة وبطل اليابة دى"
وكلام كتير من نفس النوعية دى كنت دايما بسمعه من البيت واتهامات كتير بحاجات مش في .. الاول كنت بحاول افهمهم وجهة نظرى وادافع عن نفسى .. بعد كدة بقيت مش بقر ولا مهتم انى ادفع التهم و الفهم الخاطئ لى .. اصيبت بالخرس والبلادة الشديدة تجاه اى حد يقولى على حاجة معملتهاش او صفة مش في .. فصلت نفسى عن العالم دى تماما ..مبقاش يهمنى ابدا ولا تفرق معايا بالمرة رايهم فى خالص كانهم مش موجودين فى حياتى .. اتعودت على كدة وانسجمت مع نفسى اوى .. حياتى بقت بالظبط كالتالى .. انا عايش فى سينما بتعرض فلم مدته عشرة خمستاشر سنة شغال عرض متواصل والناس دى هى اللى بتمثل فى الفلم وانا رايح جاى قدامهم بس هم فى بعد وعالم غيرى.. بقو عبارة عن خلفية ومزثرات صوتية فى حياتى .. هما يزعقوا ويتخانقوا مع واحد فى الفلم تقريبا طول الفلم فاهمينه غلط .. وانا مالى اكيد الكلام مش لى ..
خرجت بعد كدة للعالم اللى برة اللى هو الكلية وبعيدن الشغل .. نفس المشكلة واجهتنى مع الناس اللى بقت غبية اوى و قاسية اوى .. مش بتقدر تسمع بعض مش بتقدر ترحم اى اختلاف . الطيبة والرحمة والحنية بقت عبط ومرض .. انك تكون فى حالك مش بتتدخل فى اللى مش يخصك ولا بتتكلم ولا تتريق على خلق الله بقت انعزال وانطواء وجبن .. ان تكون الفلوس بالنسبة للك وسيلة مش غاية وانك تكون راضى بقى اسمه سكون وعدم طموح ... انك بمنتهى السهولة تقدر تطلع اللى فى جيبك لانك شايف ان صاحبك الفلانى والى بيه بقت سذاجة وهبل .
الناس كلها بقت ابطال الفلم اللى انا كل علاقتى بيه انى ساكن فى السينما اللى بتعرضه .. لكن هما فى عالم غير عالمى وفى بعد غير بعدى.
هاكمل حياتى لوحدى بعيد عن الناس وقرفهم وصراعتهم اللى معظمها يتحل بكلمة حلوة او ابتسامة ود صافية .. بس الناس مش بقت بتحب الهبل دة ولا انا بقيت احب الناس دى.
دايما بقت باصص للسما مستنى سفينة الفضاء اللى هاتنزل تاخدنى من هنا وتقولى انت ايه اللى مقعدك مع الناس دى مكانك مش هنا ..لا هايفهموك ولا هاتفهمهم ..

بحب اوى الاغنية دى .. بتبكينى اوى
لم يعد يمكن ان ابقى هنا .. فهنا يبكى على بعضى بعضى

يا كل اللى شايفين الحنية والطيبة عبط ومرض يستوجب العلاج .. انا مش عاوز اخف .. يا ريت انتوا اللى تعيوا زى .. يا رب تعيوا زى .
وبمناسبة عيد ميلادى احب اهنى نفسى واقولى
"كل سنة وانت طيب وعبيط"

بحبك اوى يا انجى

٠١‏/٠٧‏/٢٠٠٧

عارفة


حبيبة قلبى وعمرى وايامى وسنينى..
عارف ان اليومين اللى فاتوا كانوا رخمين اوى وزحمة اوى وتعبونا اوى اوى .. اسمحيلى اخد بايدك بعيد عن الناس دى كلها ونتمشى فى شوية عشان فى كلام سر عاوز اقولهم ليكى ..شششششش

نور عينى..
انا بحبك اووووووى ومحتجالك اوى ..
عارفة انى اول ما بمسك ايدك بحس ان لاقتنى.. ببيقى عاوز اضفر دراعى كله مع دراعك .. عاوز اجدلهم مع بعض مايفترقوش ابد.
عارفة .. اول ما ببص فى وشك بحس كأنى رجعت لوطنى واهلى وناسى ..بقيت حافظ تضاريس وشك زهرة زهرة فى كل بستان و دمعة دمعة فى كل نهر.
عارفة.. بمووووووووت بموووووت بجد لما بحس انى مش قادر اشيل لحظة حزن من عنيكى ... بحاول اعوضك عن كل الحزن والالم اللى شوفتيه..
عارفة يا انجى .. والله والله ماهتلاقى حد بيحبك زى ولا شايفك زى ولا هايستحملك زى ولا احن منى عليكى .
عارفة يا انجى .. انتى مش هتقدرة تتخيلى ولا تعرفى حبى ليكى شكله ايه ولا اد ايه ولا ممكن اعمل ايه عشانك ولا بعمل ايه عشانك من غير حتى ما قولك انا بعمل .. بس كل اللى اقدر اقولك عليه ان حبى ليكى زيادة عن اللزوم . وفوق الوصف والمعلوم.

بحلم باليوم الى ربنا يجمعنا فيه سوا فى بيت واحد .. عارفة هاقولك ايه ساعتها واحنا داخلين من باب البيت ..؟ هاقولك حمد لله على السلامة.

يلا نرجع بقى لحسن نتأخر ..
بحــبــــــــــــــــــــــــــك

٢٩‏/٠٥‏/٢٠٠٧

عشان بحبك


عشان بحبك زيادة عن اللزوم
عشان بحبك فوق الوصف والمعلوم

لانى بحبك اوى اكتر من دنيتى.. فى لحظة غبية حسيت فيها انك بتبعدى عنى الدنيا اسودت قدامى وبقيت مش شايف ولا فاهم ولا قادر اسيطر على نفسى .. دخلت فى المود الزفت دة وقفلت التليفون.
حبيبة قلبى وعمرى كله.. سامحينى لو كنت اتصرفت بغباء وانا فى المووود دة و اوعدك انه مش يتكرر تانى وانى لو زعلت منك هاجرى عليك اشتكى منك اليك .
اسف على اى لحظة حزن كنت انا السبب فيها ودة بقى اللى مش ممكن اسامح نفسى عليه ..انى اكون انا سبب حزنك ولو للحظة .. يا نهار اسود دا انا كل امنيتى فى الحياة انى اقدر اسعدك واعوضك .
والله العظيم يا عمرى انا بحبك ومليش غيرك .. ومش عاوز غيرك .. فاهمة يعنى ايه مليش غيرك؟


حبيبى الحب اللى بنا زى الطفل دة .. احنا الاتنين لازم نخلى بالنا منه لانه جميل اوى

عشان بحبك زيادة عن اللزوم
عشان بحبك فوق الوصف والمعلوم

٢١‏/٠٤‏/٢٠٠٧

وراء الشمس

وراء الشمس..
وثائقى قناة الجزيرة اللى حاول النظام يمنع اذاعته ولفق للمعدة والمخرجة هويدا طه قضية .
اتفرجت على الحلقتين اللى اتذاعه..مفيش كلام يتقال ..اصلى هاقول ايه ..
كرهت الكلام؟.. ولا كرهت السكوت؟
كرهت نفسى ؟.. ولا كرهتهم؟
صعبوا على؟.. ولا صعبت على نفسى؟.. ولا صعبت على البلد؟
اصل اللى بيشكى وبيتكلم دة مش بيحكى عن نفسه ..لا دة بيحكى عن اللى حصله واللى هايحصلى بكرة واللى هايحصل لينا كلنا .. كلنا ضحايا محتملة.. الحكاية حكاية وقت بس مش اكتر .

شششششششششش مامنوش فايدة الكلام
الجزء الاول متقسم على خمس ملفات من مدونة
حنتكلم

وراء الشمس الحلقة الاولى 1من5 عن التعذيب في مصر




وراء الشمس الحلقة الاولى 2من5 عن التعذيب في مصر




وراء الشمس الحلقة الاولى 3من5 عن التعذيب في مصر




وراء الشمس الحلقة الاولى 4من5 عن التعذيب في مصر




وراء الشمس الحلقة الاولى 5من5 عن التعذيب في مصر








الحلقة التانية  الجزء 1





الحلقة التانية  الجزء 2





الحلقة التانية  الجزء 3





الحلقة التانية  الجزء 4





الحلقة التانية  الجزء 5






واللى عاوز ينزل الحلقات
الحلقة الاولى فى ملف واحد من موقع المحروسة

او
الحلقة الاولى متقسمة على 5 اجزاء من مدونة حنتكلم
ج1 من 5
http://www.7ntklm.com/media/1get_video.wmv
ج2 من 5
http://www.7ntklm.com/media/2get_video.wav
ج3 من5
http://www.7ntklm.com/media/3get_video.wav
ج4 من 5
http://www.7ntklm.com/media/4get_video.wav
ج5 من5
http://www.7ntklm.com/media/5get_video.wav
ملحوطة: غير امتداد اخر اربع اجزاء من
wav to wmv

الحلقة التانية فى ملف واحد من موقع المحروسة
http://www.el-ma7rousa.com/shows/elma7rousa_jsc_part2.wmv


١٠‏/٠٤‏/٢٠٠٧

صفحة جديدة




صفحة جديدة من حياتى ابتدت.. ودة اللى مكتوب فيها..

تعريفات ..
سرعة الضوء:
هى السرعة اللى كنت بحاول اسبقها بعينى بعملية انسحاب سريعة قبل هجوم الضوء اللى كان عاوز يفضحنى ويكشف لها انى كنت ببص عليها.
الجنة:
هى تللك المكان الذى يحده من الشمال اى حاجة ومن الجنوب مش هاتفرق ومن الشرق ولا تاخد فى بالك اما من الغرب فاى حاجة مكررة من اللى فات.. المهم انها بتكون موجودة فى المكان دة.
الانتقال الانى:
هى انتقال الانسان من الجنة الى النار او العكس بكلمة او بنظرة من حبيبته.
الدورة الدموية:
هى تلك الدورة التى تمسك هى بصافرة البداية والنهاية فيها .. يمكنها ايقافها بالمرة فيكون الموت نتيجة حتمية او ابطائها فتصاب بهبوط حاد او تسريعها حتى يتم اعلان اصابتك بجلطة كنتيجة نهائية.
--------------------------------------------------------------

كنت عاوز اقولك بحبك قد ايه.. بس اكتشفت كم هى حمقاء وجوفاء وناقصة كل تلك الكلمات التى تملئ قواميس اللغة.
فكرت استدعى ارواح اكثر شعراء الرومانسية والغرام موهبه وحرفة وتمكن عشان يروح ويجى فى كل قواميس ومعاجم اللغة فى محاولة يائسة منه ومنى لاعادة ترتيب تلك الكلمات وجعلها قادرة على وصف مشاعرى.
مش لاقيت فى الاخر غير ابيات محمود درويش اللى بيعانى فيها من نفس مشكلتى

آه.. هل أدركت قبل اليوم
أن الحرف في القاموس، يا حبي، بليد
كيف تحيا كلّ هذي الكلمات!
كيف تنمو؟.. كيف تكبر؟

وفى الاخر لاقيت الكلمة
انا بحبك اووووى



٣١‏/٠٣‏/٢٠٠٧

حركة تنقلات



عندى خبرين ..
الاول. انى معزل من شغلى القديم والحمد لله اتقبلت فى الشغل اللى كنت اتكلمت عليه قبل كدة.. بعد 3 انترفيوهات الحمد لله.. شغل افضل واحسن وحاجة بحبها اكتر وممكن اتميز فيها مش بس ابقى مجرد ترس فى ماكنة مابحبهاش.. مرتب افضل .. يعنى الحمد لله ..هابدأ معاهم من اول شهر 5 او من نص 4 . خايف من مسؤليات الشغل دة لانها كبيرة .. مش عارف ليه دايما اخاف من الخطوة الجاية .. دايما مش واثق فى نفسى .. خايف اتكلم مع الناس لحسن مايقبلونيش .. خايف خايف اقول انا بحب لحسن اترفض .. خايف وخلاص .

الخبر التانى .. انى هاعزل من المدونة القديمة اللى على بلوجسم وانقل هنا على بلوجسبوت .. يعنى حتى ابقى قريب من الشغل الجديد :) ..
كنت متردد اوى فى القرار دة لانى متعلق بمدونتى اوى ..اقنعتها وقولتلها انى مش هاسيبك هنا ..لا انا هاخدك ونروح حتة تانية ..يعنى مجرد هانعزل لسرفر تانى ..انتى عارفة انى مقدرش حتى افكر انى اسيبك ..مانتى عارفة ماليش غيرك ..بجد

٢٣‏/٠٣‏/٢٠٠٧

ادركت



ادركت ان احساسى الحالى بعدم الامان سيصبح غدا اجبارى بامر الدستور ..
ادركت ان استعباد النظام وكلاب النظام لنا سيصبح غدا حق مشروع دستورى ..
ادركت ان كلام امل دنقل "كيف تنظر فى عين امراة انت تعرف انك لا تستطبع حمايتها" سيصبح غدا قانون ملزم بامر الدستور..
ادركت كيف سنصبح غدا من عداد اللاجئين بعد ان يسحبوا منا الهوية والوطنية بقوة الدستور..
ادركت معنى اغتصاب الأم امام الأبناء تحت حراسة الدستور..
ادركت حجم الكارثة وادركت حجم الجهل بها ..
ادركت ان السرايا و كلاب السرايا كانت صادفة عندما وصفت زماننا بانه ازهى عصور الحرية والديموقراطية ..لاننا غدا سنشتاق الى تلك الايام ..
ادركت تفاهة مشاكلى الشخصية والنفسية امام تلك الفاجعة .
ادركت عجزى..
.
.
.
ادركت انى لم اكف عن البكاء منذ ان ادركت
 
 

 
يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .

تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !

أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .

يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .

احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!

دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .

يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .

١٧‏/٠٣‏/٢٠٠٧

اليكى



كنت محتاج اسمع صوتك اوى
كنت محتاج قلبك جنبى اوى
كنت محتاج احس انى سوي
************************
حبيبتى ..
نعم
انتى ساعات بتعملى حاجات غلط؟
اكيد ..مين مابيغلطش
طب انا محتاج امسك ايد… (قبل ما اكمل كانت رامية نفسها فى حضنى)
**************************
الو
ايوة مين ..؟
ايه دة انتى مسحتى رقمى؟
اه.. سلام
مع السلامة
حسيت ان اسمى اتحذف من الوجود ..
انى بقيت مش موجود
*************************
الوحدة: هو ذلك الشعور الذى يجعل صاحبه على يقين تام بوجود حياة على الكواكب الاخرى وبأنه ينتمى لاحدها ولا يمت بصلة بحياته الحالية
*************************

افهموا بقى يا بهايم



اى ..افهموا بقى يا بهايم, اخر جملة قالها اللى كان واقف جانبى فى المظاهرقبل مايقع غرقان فى دمه على الارض.
اخدت مكان زميلى اللى وقع ووقفت قدام عسكرى الرعب المركزى اللى على الجبهة التانية على بعد 10 سم منى .. ملامح العسكرى تشبهنا بس كلها غباوة وقسوة .
رفعت اليافطة اللى عليها دم زميلى وصرخت بالكلام اللى عليها..
يسقط يسقط حسنى مبارك.. يسقط الفساد
"اضرب" .. صوت الظابط
رفع العسكرى عصايته ونزل بيها على ..
طااااااااااااااااخ..
اى ..انت بتضربنى ليه .. انت عارف احنا بنقول ايه ولا عاوزين ايه ؟
طااااااااااااااخ..
طب انت عارف احنا مين؟
طااااااااااااخ..
احنا اخواتك .. احنا منك وانت منا
طااااااااااخ..
هما اللى مش منا
طااااااااخ..
انا وانت اللى مش لاقين شغل ولا عيش ولا دوا
طااااااخ..
هما اللى بيسرقوا فلوسى وفلوسك ويجوعونا
طاااااخ..
انا وانت اللى بيذلونا
طااااخ..
هما اللى جابو لامى وامك الكبد والسرطان وهما اللى غلوا الدواء بعد ما سممونا
طاااخ..
هما السريا وكلاب السريا واحنا عبيد الوسية
طااخ..
كام مرة شتموك بابوك وامك زى
طاخ..
ودلادك شبه ولادى ولا شبه ولادهم ؟
طاخ.
جزمتهم معلمة على ضهرى وضهر ابويا وضهرك وضهر ابوك
طاخ
خت بالى ان ضرباته بدات تخف وان عنيه مدمعة وان ملامحة رجعت تانى وبقت شبه ملامحنا
بس دى اوامر يا بيه
اوامر انك تضرب اخوك واختك لما يقولو اننا جعانيين ومنهوبين ؟
اضرب يا عسكرى .. صرخ الظابط لما شافه بيتكلم معايا
مش قادر يا فندم..
طااااخ.. المرة دى الضربة جت على دماغ العسكرى نفسه من زميله الى واقف جنبه.
وقع على الارض جنبى ..دمه ساح على دمى شبكت ايدى فى ايده.
واخر حاجة سمعتها .. يسقط يسقط حسنى مبارك
طاااخ..
انت بضربنى ليه.....
.
.
.

افهموا بقى يا بهايم,,

توالى سقوط المتظاهرين والعساكر اللى بدأوا يفهموا على الارض بنفس السيناريو اللى فات.
.
.
.
.
.
.
بعد 3 ساعات ..
الميدان فااضى ..اللهم الا من جثث ناس عادية مشبكة ايدها فى ايد عساكر فى وسط بركة دم.
واقف برجليه على الجثث دى الظابط اياه ..
الو الو عمليات ..تمام يا باشا ..كل شئ تحت السيطرة وتحت رجلينا ..
تأمر معاليك يا باشا
.

١٠‏/٠٣‏/٢٠٠٧

انا والمدونين

بعد مجهود كبيرة من محمد عادل اقنعنى انى اخرج من العزلة والوحدة اللى انا فيها وانى اروح معاه اجتماع المدونين التالت فى كافتريا الابداع فى الاوبرا..
كنا حوالى 60 شاب زى الفل وناس كنت متعود اقرالهم من زمان ومتابعهم بس عمرى ما عملت كومنت عندهم وناس مكنتش اعرفهم مكنتش عاوز امشى عشان ماسبهمش..زى الاستاذ حسنى سليمان اللى قالبلته وهو خارج من صلاة المغرب ولاقته خدنى فى ايده كأنه يعرفنى من زمان حركة حميمية جدا انك انك اول مرة تتعرف على حد ويعاملك بالطريقة دى .. كان فيه ابوة غريبة فياضة يحس بيها كل اللى يشوفه.. ثقافة وفن و علم .. استاذ حسنى هاقولك زى كل اللى بيشوفك ما بيقولك "ممكن تبقى ابويا؟"
كان فى كمان استاذ محمد شقير .. كنت بسمع له باهتمام بالغ مع انى متكلمتش معاه.
ياسمين.. العقل المدبر والمنظم للقاء دة .. افكارها متحررة جريئة.. بتعبر عن نفسها حلو اوى.. مختلف معاها فى حاجات كتير ..بس باحترمها جدا كانسانة.
كان فى طبعا سمراء صاحبة القصر المسحور زى ما انا مسميها .. بحب كلامها اوى رومانسيها لما بتبقى رومانسبة وشكوتها لما بتبقى مخنوقة.. الكل كان عارفها الكل كان حابب يتكلم ويهزر معاها .. كانت عاملة زى فراشة شقية لذيذة.
محمد عادل اللى اعرفه من كام يوم بس وبقيت احبه اوى كأنه اعرفه من زمان قلبه طيب اوى وشه يحسسك براحة غريبة .. محمد انا عمرى ماهنسى انت وقفت جنبى ازاى.
ايلارى وعمرو شباب جميل اوى ان شاء الله اتعرف بيهم اكتر الايام الجاية..
مش عاوز انسى حد بس الناس كلها كانت جميلة وبالظبط زى ما استاذ حسنى قالى ان اهم حاجة ان اللى جمعهم هى المحبة .. من غير مصلحة لاى طرف.
هلوسة..كان نفسى تيجى واشوفك


الناس اللى جات اهى

اى حاجة بقى::انجى::
http://anooojy.blogspot.com/

منغبرة شوية ::سلمى صلاح::
http://ssalah.blogspot.com/

Bogus :: white seagull::
http://whiteseagull.blogspot.com/

moorgen:: shereen::
http://moorgen.blogspot.com/

tota
http://tota-tota.blogspot.com/

من الآخر::دوللى::
http://looly-looly.blogspot.com/

سهر الليالى::amany::
http://amdonia.blogspot.com/

بيكيا ... روبابيكي::هانى جورج::
http://bikya.blogspot.com/

واحد من الناس::طارق::
http://1ofthepeople.blogsome.com/

مصر هى امى::محمد عادل::
http://misr-hya-omi.blogspot.com/

احدهم::محمد مصطفى::
http://a7ad.blogspot.com/

مش عارف::عبد الرحمن مجدى::
http://mesharef.blogspot.com/

وجــهــة نــظــــــــــر:: MoHaMeD HoSSaM::
http://waghtnazr.blogspot.com/

No Fear:: Mohamed::
http://newmido26.blogspot.com/

اريدكى انثى::عمرو احمد::
http://oredoky-ontha.blogspot.com/

طرطشة افكار::سفاح كرموز::
http://meshmesh5000.blogspot.com/

افنان الفنون::استاذ حسنى سليمان::
http://hosny45.blogspot.com/

ahmEd_H::احمد الحداد::
http://ahmedhelmasry.blogspot.com/

TheAlien::بيشوى::
http://alien-besho.blogspot.com/

نظارتي السوداء::شادى فايد::
http://shidwik.blogspot.com/

NonSense:: Ramy Emil::
http://ramyemil.blogspot.com/

حاجه صغنونه.. من غير فذلكه::وينكى::
http://pinsywinsy.blogspot.com/

نجمه فى السما::وينكى::
http://astronomystar.blogspot.com/

daylight::مريم::
http://day-light.blogspot.com/

انا وانا::ابراهيم ..معايا::
http://anaweana.blogspot.com/

حد فاهم حاجه؟::ايلارى ::
http://yme1.blogspot.com/

اصغر مدون - وتحدي::عــيل شــقي::
http://3yl-shaky.blogspot.com/

ياقوت
http://yakooot.blogspot.com/

tona5000:: tona::
http://tona5000.blogspot.com/

frozen love::محمد حامد::
http://m-rashed.blogspot.com/

لسعة دبور::اسامة::
http://dabbor.blogspot.com/

مصـ( الخير )ـعب ::مصعب::
http://mos3abof.blogspot.com/

kelma::كلمة::
http://kelmetfagoumy.blogspot.com/

لا تنتظر احدا .. فلن ياتي احد::LAMIA MAHMOUD::
http://lamiaamahmoad4810.blogspot.com/

i a dead man talkin to u from my grave::الهوارى:
http://fromgrave.blogspot.com/

أهلا بك في كوكب الأرض::shady::
http://shadytommy.blogspot.com/

انظر حولك في غضب::إبراهيم::
http://hearttrainer.blogspot.com/

بنت سعد::ايمان سعد::
http://bent-sa3d.blogspot.com/

في عمــــــــق الحيـــــــاه::ادم المصرى::
http://3mkelhyah.blogspot.com/

أنا إللي بالأمر المحال أغتوى::Amira Hassan::
http://amirahass.blogspot.com/

مش فارقة نتكلم::احمد فؤاد::
http://ahmedfouadeldin.blogspot.com/

ليـــــه يا بنفـســـــــــج ..؟::Bassma::
http://bassama.blogspot.com/

يا صبر ايــــــــوب::ايوب::
http://ayoubelmasry.blogspot.com/

Tahyees ..::ايهاب على::
http://ihapology.blogspot.com/

مداراتى::bassem el shazly::
http://madarati.blogspot.com/

أميرة
http://just-amira.blogspot.com/

michealitoo::مايكل::
http://strugglingmichealitoo.blogspot.com/

tigress-diaries
http://tigress-diaries.blogspot.com

حكاوى اخر الليل:: استاذ احمد شقير::
http://shokeir.blogspot.com/

skylight ::ياسمين::
http://amyasser.blogspot.com/

راسبوتين::ايمن فاروق::
http://raspoutine1.blogspot.com/

The eagles::ايهاب::
http://hoba28.blogspot.com/

NaDoOoOoOoO::نادين::
http://cestmoi-nadine.blogspot.com/


hwahwa3.blogspot.com
hadontamasrya.blogspot.com
ahmedabomosallem.blogspot.com
التلات مدونات الاخرنين دول عنوانهم مش مظبوط... يا ريت اصحاب المدونات دى يصلحونا العنوان

على فكرة كمان ..محمد حامد عنده حفلة يوم التلات الجاى 13-3 فى ساقية الصاوى الساعة 8 مساء 
يا ريت كلنا نروح ونشجعهfrozen love  

ملحوظة مهمة اوى.. انا اسف جدا جدا  انى نسيت اقول ان ايهاب ايجل هو اللى تعب اوى عشان يجمع اسامة المدونان دى من الناس اللى كاتنت يموجودة  وانا بس ظبط الينكات مع اسماء المدونين..
ايهاب اسف والله انى نسيت اقول حاجة زى دى





٠١‏/٠٣‏/٢٠٠٧

انا بردان


رجعلي تانى احساس البرودة الفظيع .. كأنى مرمى عريان فى وسط صحراء جليدية قاسية.. ملفوف على نفسى بحاول احس بي ..بحاول ادفيني.
الاحساس بالوحدة احساس يلازمه دايما احساس بالبرودة دى مش عارف ليه .عشان كدة لما حد بنحبه بيلمسنا بنحس بدفئ غريب بداء يجرى فينا..
لما امسك ايد حبيبتى هاخاف اوى لما اسيبها لموت من البرد.
انا بكره البرد اوى عشان بيفكرنى بوحدتى .

ساعات كتير بحضن نفسى … وساعات كتير بمسك ايدى

معلش يا حبيبتى دايما منكد عليكى كدة .. منتى عارفة مليش غيرك اشكيله.

انا كنت عامل اجازة من الشغل بكرة الخميس .. بس هالغيها وانزل ..مش عاوز اقعد لوحدى وانا كدة.. الهى نفسى بالشغل ومشاكله عشان اليوم يعدى

٢٦‏/٠٢‏/٢٠٠٧

محمد خلف… واحشتينى يا مصر




فرحان اوى …مش عارف ينفع افرح فى حاجة زى كدة ولا لا .؟
مكنتش متخيل ان لسة فيكى يا مصر الناس دى..
ساعات كتير كنت بتمنى ادخل الجيش بس على امل ان الموقف دة يحصلى وارفض انى اقف حرس ليهم ..ارفض انى احميهم.
محمد خلف .. انت ارجل واحد فى البلد دى
محمد خلف .. انت قولت لا
محمد خلف .. صورتك منورة
محمد خلف .. سامحنا لو مقدرناش نعملك حاجة .. مشكلتك انك راجل فى زمن وفبلد الرجولة فيها تهمة الكل بينكرها
محمد .. انت فارس هذا الزمان الوحيد وسواك المسوخ

عاوز اقولك حاجة كمان .. انت خلتنى اصرخ بعلو صوتى زى المجنون والدموع مرغرغة فى عينى

واحشتينى يا مصر
==================================
تحديث 1
يدرس مركز هشام مبارك
تقديم مساعدات إنسانية لأسرة أمين الشرطة
محمد خلف أمين الشرطة المحبوس بسبب رفضه لحراسة سفارة الكيان الصهيوني
للاستعلام والمشاركة وإبداء المقترحات رجاء
الاتصال بمركز هشام مبارك لحقوق الإنسان
1 شارع التوفيقية
القاهرة
هاتف/فاكس:

(202) 5758908
أو المراسلة على البريد الإلكتروني للمركز
hmlc@link.net
====================================
تحديث 2..
أخر الاخبار نقلا عن المصريون..
قرر وزير الداخلية اللواء حبيب العادلي أمس نقل أمين الشرطة محمد خلف حسن إبراهيم بعد صدور حكم بحبسه ستة أشهر لرفضه تنفيذ تكليف بالعمل ضم طاقم حراسة السفارة الإسرائيلية بالجيزة. وأودع الأمين المضرب عن الطعام منذ نحو 15 يومًا الحبس الانفرادي بسجن "القطا" بعد مصادرة الهاتف المحمول وحرمانه من الزيارة، حتى لا يدلي بأية معلومات للصحف والإعلام طول إقامته بالسجن لحين تنفيذه العقوبة المقررة بحقه، على أن يعود بعدها لعمله في تأمين مقر السفارة الإسرائيلية.
جاء قرار نقل الأمين إلى السجن بعد يوم من نقله إلى مستشفى قوات الأمن التابعة لوزارة الداخلية، بعد أن فشلت محاولات الأطباء في تغذيته صناعيًا، وذلك وسط حراسة أمنية مشددة من قوة مباحث قسم شرطة الجيزة.
يأتي ذلك فيما اتهمت وزارة الداخلية، أحد أعضاء مجلس الشعب عن إحدى دوائر الإسكندرية التابع لها محل إقامة أمين الشرطة- تحتفظ "المصريون" باسمه- بالاتصال بمنظمات حقوق الإنسان وتسريب أخبار المحاكمة.


يعنى راجل بين الحياة والموت ومستمر فى اضرابه عن الاكل وبرضو خدوه من المستشفى عشان ينفذ العقوبة .. لا وايه بعد ما يخلصها يروح عشان ينفذ قرار النقل ويحرس السفارة.. دة عشان يبقى عبرة ومحدش يفكر يعملنا فيها بطل تانى .. يعنى هاتتحبس وبرضو هاتنفذ.. الحكومة خاف لحسن كل واحد يعمل اللى هو عاوز يعمله اللى هو حاسس انه هو دة الصح .. وساعتها يمكن تكبر فى دماغ الشعب ويعمل الحاجة الوحيد اللى نفسه يعملها.. انه يحس انه كيان موجود . ودة اللى لاااااااا يمكن تسمح بيه الحكومة.


٢٣‏/٠٢‏/٢٠٠٧

بوست من غير عنوان


صحيت من الحلم .. كان حلم جميل .. بس الحلم الجميل ساعات كتير بيوجع اوى زى الكابوس ويمكن اكتر .. لانك لما بتفوق وتلاقى كل شئ جميل كان معاك اختفى وكل صوت حنين رقيق اتخرس مرة واحدة.. ساعتها بتعرف ان الحلم الجميل برضو يتخاف منه زى الكابوس.
بس خلاص مفيش حاجة … انا كويس
انا نازل اتمشى فى الشوارع شوية .. او يمكن اروح القهوة اللى بقعد عليها .. لا انا هاروح السينما ..ايوة هاروح اوديون اشوف فيها ايه ..
انا اسف لاى حد وكل حد انا سببتله الم او ضايقته فى يوم من الايام
اسف لاى حد كشرت فى وشه لحظة واحدة

اسف لنفسى انى عملت فيها كل اللى عملته دة
اسف يا عمرى انى سبتك تتسرق منى
اسف لى احد كان معايا حاجة هو محتاجها اكتر منى ومخدتش بالى
ملك.. خالو طارق بيحبك اوى
ال باتشنو.. انت ممثل خرافى
ساندرا بولك… كفاية نظرة واحدة منك تخلينى انسى همومى
بحبك اوى يا نبيل يا حلفاوى

عاوز اغنى ممكن تسمعو منى الاغنية الاخيرة دى

انا مش هافضل كدة على طول
مش هاستنى العمر يعدى
انا مش هاسكت لازم اقول
قد ماهاخد قد ماهادى
انا دلوقتى براجع نفسى قبل مالايام تقوت
وعشان حاجات تعيش حاجات كتير لازم تموت
مش كبرياء ..لكن بصلح كل شئ فى انكسر
ومن الغباء انك تعيش زى الملاك بين البشر
يعنى براجع نفسى ..واللى زمان انا عشته لغيرى
انا دلوقتى هاعيشه لنفسى

انا نازل … اشوف وشكو بخير
انا ماشى

٢١‏/٠٢‏/٢٠٠٧

بين الحقيقة والخيال


مش عارف كنت بحلم ولا دة كان حقيقة..اول مرة اكلمها على الماسنحر..بدات معايا على طول بالسؤال ان كنت لسة مخنوق؟ قاعدنا نتكلم وكل ما تتكلم اكتر احس اد ايه احنا قريبين وشبه بعض اوى ..بتسمع اللى بسمعه بتحب اللى بحبه .. حتى بتعمل حاجات كنت فاكر انا بس اللى بعملها (حاجات عبيطة)
اتكلمنا اكتر من تلات ساعات ماحستش بيهم خالص وكأن الوقت دة مش موجود ..كأنه خرافة او اسطورة ملهاش وجود ..بس لما قلتلى انها هاتمشى عرفت ان الوقت مش خرافة او اسطورة ..عرفت انه عامل زى طائر رخ كبير بيفرد جناحة ويخطف منك اللى خلاك تنساه عشان متنسهوش تانى وتفضل فاكره ..ولما يرجعهولك تفضل خايف منه وعينك عليه لحسن يفرد جناحه تانى ويطوى جواه اللى انت مش عاوز تفارقه… خد منى كتير اوى ..خد اعز الناس ومرجعهمش خد منى مللك الضحكة الصافية اللى فحياتى وخد من محمد اخويا وابويا وامى وصاحبى كل حاجة .. افرد جناحك بس مرة كمان اشوفهم وملى عينى منهم وبعدين .. وبعدين ابلعهم تانى .
انا خرجت برة الموضوع .. ارجع للملاك اللى نزل يطمن على ومشى ..كانت كل شوية تسالنى طب انت احسن دلوقتى ؟ السؤال دة لما واحدة هى اللى تسالهولك بيكون ليه طعم مختلف تماما..مش متعود عليه .
الحلم لسة مخلص.. قالتى انها مروحة دلوقتى من الشغل وهتتصل بى عشان تتطمن على .. جرس الموبايل بيرن ..مش ممكن تكون هى ..الو طارق ازيك ..ارتبكت اوى ..سكت كتير ..اول مرة اكلم بنت فى التليفون ..كان منظرى وحش .. المهم اطمنت على واقفلت ..انا لسة بحلم.. هو فى كدة؟ ..ممكن كدة ؟
كان نفسى اقولها انى عاوز اشوفك … بس مافتكرش انا اقدر اعمل كدة .. انى اقولها ولا انى اشوفها فعلاً؟ الاتنين لو حصل دة هابقى متوتر جدا ..وشكلى وحش جدا ..عمرى ماهتمت بلبسى وهدومى.. مانيش الشاب الوسيم اللى واخد باله من نفسه ..طول عمرى فلوسى ضايعة على الكتب والكمبيوتر بتاعى والسينما… لا انا هاطلب منها نكون فى مكان عام مليان ناس ونشوف ان كنا هناقدر نعرف بعض ولا ..ولو عرفتنى او عرفتها منقولش ولما نروح واقابلها على النت واقولها انتى اللى كنتى لابسة كذا .. وتقولى طب انت اللى كنت بتعمل كذا.. وننزل مكان تانى ونجرب تانى .. عبط مش كدة ..وايه يعنى

بس بس عندك .. انت ايه الللى هايخليك تكمل فى السكة دى تقابلها وتخرج .. انت قولت هاتبقى اخت وصديقة بس ..مش كدة؟ وبعدين مش ممكن تكون بتتسلى بيك وبتلعب بمشاعرك؟ اصل انا عارفك اى واحدة هاتكلمك كلمة حلوة هاتتعلق بيها وتفتكرها معجبة بيك ولا حاجة ..
انا ماقولتش كدة ..انا كمان عاوزها اخت وصاحبة .. وموضوع انها ممكن تكون بتتسلى .. مش عارف بس من حقى اجرب وادى نفسى فرصة ..واديها هى كمان فرصة .. انا مش هافضل طول عمرى كدة .. وانت فاهم عذاب كلمة كدة دى ..
انت مش قد الموضوع دة ..بلاش احسن انت عارف نفسك ..
ايوة عارف نفسى ..بس هو مش ممكن تطلع هى اللى بحلم بيها واللى تقدر تقدر ظروفى وتحتوى ارتباكى بحنية الام ورقة الحبيبة. ؟
ا
نت حر ..
ايوة انا حر ..

مش عارف ليه ..باتونس بيكى ..وكأنك من دمى ..على راحتى معاكى وكأنك امى.

كل اللى فات دة عبارة عن خليط بين الحقيقة والخيال ..حاجات منه حصلت وحاجات اتخيلتها وحاجات اتمنيت تحصل وحاجات خايف تحصل...ساعات المنطقة اللى بين الحقيقة والخيال بتكون احسن من الخيال الخالص برومانسيته الناعمة اللى ممكن تزحلق الواحد وتوقعه على جدور رقبته واحسن من منطقة الواقع المر اللى يفضل يجرح فيك بشوكه وسكاكينه


١٥‏/٠٢‏/٢٠٠٧

فضفضة 1


كل ماجى اكتب امسح كل اللى كتبته وارجع اقعد من حزنى تانى ..كذا مرة اكتب وارغى وافضفض واعيط لغاية ماقلبى يوجعنى بجد وبعدين اروح ماسح كل اللى كتبته وارجع كما كنت .
مخنووووق اوى اليومين دول مش طايق حد يكلمنى.. عنيا مدمعة طول الوقت .حزنان على نفسى اوى ..احساس الوحدة بيقتلنى . عمرى ماتمنيت يكون لى واحدة معايا تحبنى وتفهمنى وتخاف علي زى اليومين دول ..عمرى ما عرفت بنت ولا حتى اتكلمت مع واحدة ..الانثى بالنسبة لى حاجة كبيرة اوى مفتقدها اوى .. طب خلاص بلاش الموضوع دة انا مابحبش اتكلم فيه.
اللى جاى دة لقطات من حاجات دايما شاغلة دماغى ومابتفرقش بذات دلوقتى ..
::كيف تنظر فى عين امراة انت تعرف انك لا تستطيع حمايتها:: عمنا أمل دنقل
::السلام خيار استرتيجى:: كبار تجار الخيار
::القالك حد:: انغام
::اتخنقت..انا ماوصلتش لحاجة من اللى حلمت بيه…سوء اختيار دة ولا سذاجة ولا ايه..رجعت للصفر ..من مكان مابدأت.. اتخنقت:: محمد محى
::لا مال لاحد إن جاع احد:: مش عارف قريتها ولا سنعتها فين .
:: الحقيقة أن المواطن المصري قد تغير كثيرًا جدًا، وما أريد قوله هو أن هذه الحكومة هي الإفراز الطبيعي لهذه الحالة.:: د/ أحمد خالد توفيق
:: مصر بقت قاسية اوى على ولادها.:: هند صبرى من فلم عمارة يعقوبيان
:: لما ابقى عاوز اكل ومش لاقى واما ابقى عاوز البس ومش لاقى ولما ابقى عاوز اشتغل ومش لاقى ولما ابقى عاوز احب واتجوز ومش لاقى يبقى لازم اشم عشان انسى انى بنى ادم اصلاً.:: شخصية الشاب المسطول من مسرحية يا غولة عينك حمرا…على فكرة كان مشهد مؤثر جدااا بيخلينى ابكى بشدة بعده.
:: لم أعد فادراً على انجاز شئ, اغتالوا همتى ولربما اشتركت معهم فى هذه الجريمة بتهاونى وقلة حيلتى وصدق نيتى, انا رجل من رجال هذا العصر تمسك بمثاليات لم يعد هناك من يؤمن بها وكلفنى هذا الكثير وفقدت كل شئ سلبونى كل ما املك, مثالياتى واحلامى, تحطمت كلها على صخور الواقع المقزز المخزى, لميتركوا إلا اشلاء رجل, وحطاماً لشئ على ما يبدو كان يسمى يوماً ما بالإنسان, هل لدينا ما يعننا على الاستمرار؟ هل نملك اى من مقومات المقاومة أو التضحيات الواجب تقديمها لدرء الأيادى السوداء المستمرة فى افسادنا بالقوة لنتحول إلى مسوخ تمشى على قدمين؟:: القارئ ادهم حمزة فى رسالة الى جريدة الدستور
:: انا عن نفسي نفسي اهاجر علشان ولادي يطلعو يحبو مصر مش يعيشو فيها ويكرهوها:: مدونة الكابيتشينو للجميع
::مش لو كان لى واحدة فى حياتى كنت زمانى مرمى فى حضنها دلوقتى وبعيط واشكي لها من غير ما اخاف تفهمنى غلط ولا اخاف تفهمنى صح.:: انا بكلم نفسى
::انا بكره رقم الواحد لانه بيفكرنى بى:: انا
::بابا طلق ماما:: من ساعة ما اختى الصغيرة قابلتنى بالكلمة دى وهى بفتحلى الباب وبيتعيط وانا الزمن اتجمد عتد اللحظة دى بالنسبة لابويا وامى ..رغم انه رجعها تانى يوم الا ان الموضوع كان منتهى بالنسبة لى ..انا بكرهم هما الاتنين بذات هو .. بتجيلى حالة عصبية لمجرد سماع صوته .. اليوم دة كان اكبر شرخ فى حياتى ..انا قبل اليوم دة مش انا ابدا بعده..كلمة اسرة وبابا وماما بتعصبنى ..كل اتنين بيتجوزو مش بيتخيلو انهم بيتخكمو فى مصير ومستقبل ولادهم بشكل مباشر و عميق..انا شايف ان معظم الاباء ولامهات هم جناة ويستهالو المحاكمة ..ساعات الاقى حد يقولى مش هم دول اللى صرفو عليك وربوك ومش عارف ايه . والفلم دة كله ..بس انا شايف ان دة شئ طبيعى وبديهى كمان ومهواش منة او حسنه منهم.. كان نفسى مايكونش دة كلامى ولا دى مشاعرى بس هو دة انا من جوا..
ايه دة انا زودتها اوى النهاردة انا نسيت نفسى وانا بتكلم معاكى ..مكنتش متخيل انى هاتكلم فى المواضيع دى ابدا..
رجعت للصفر من مكان مابدات

٠٢‏/٠٢‏/٢٠٠٧

طلب لجوء انسانى لاى حته خارج حدود مص


مش عارف ابدأ منين .. عاوز اكتب عن حاجات كتير اوى بس كلها حاجات تسد النفس ومخليانى مش عاوز اكتب حاجة خالص .. يا رب هو الواحد لحد امتى هايفضل عايش فى الغلب دة.
1- فاكرين الكليب دة.. جريدة المصرى اليوم وصلت للمواطن ايهاب مجدى فاروق اللى حكى اللى حصل وملخصه انه كان ماشى واستوقفه امين شرطة تابع لقسم امبابة اشتباه واداله الطريحة الرسمية بامر من ظابط اسمه كريم بيه اللى صور الكليب دة ..وبعدين خدوه على القسم لاستكمال باقى حقوقه الدسنورية الكاملة من شلاليت والام وشتايم والذى منه .. خراب يا مصر

المهم …بعد ما المصرى اليوم نشرت الخبر لو انت ف اى بلد محترم تتوقع ايه اللى يحصل بعد كدة ؟؟
مين يجاوب؟..ايوه البيه اللى رافع ايده هناك اتفضل..
حضرتك عشان يبقى فيه مساوة بين المواطنين قدام القانون ومحدش يبقى احسن من حد لازم يحصل معاه زى اللى حصل مع المواطن المعفن التانى اللى اسمه عماد الكبير ..يعنى حضرتك لازم يتحاكم وياخدله على الاقل 3 لاشهور زى الواد عماد.
سؤال بس ..هو حضرتك شغال ايه ؟
انا ظابط ياد ..فى حاجة؟
وبالفعل يا سادة يا كرام (مش كرام اوى ..وللانصاف مش كرام خالص) هو دة اللى هايحصل تقريباً حيث قامت قوات رجال الشرطة الاشواس باقتحام منزل المواطن الغلبان المذكور واحنجزت ابوه ومراته رهان لحد ما يسلم نفسه (والله كويس انهم مطلبوش فدية) ويتنفذ فيه مبدأ المساواة امام القانون زى زميله عماد (يحيا العدل).
كلام وسخ كتيير اوى عمال يتنطط فى دماغى دلوقتى بس ماينفعش اقوله قدامها..
اخر حاجة عشان قلبى واجعنى.. انا اطالب بحق اللجوء الانسانى لاوسخ حتة فيكى يا كرة يا ارضية المهم تكون خارج حدود مصر – مصر تلك البلاد التى لم تعد صالحة للاستخدام الادمى.


2- كنت عاوز اتكلم عن نكبة فلسطين 2 … الفلسطنين بيقتلو فى بعض ..فى
ايه ..الناس دة اتجننت ولا اتعمت ولا ايه بالظبط.. بسسس كفااااية انا ضغطى على والجلطة اهى على الابواب.. (انا قابم افتحلها)

٢٧‏/٠١‏/٢٠٠٧

Interview




اولا احب اقولك انك واحشتينى اووووى.. كنت مشغول عنك شوية اليومين اللى فاتو… معلش كان عندى ظروف فى الشغل والله…
عندى خبر حلو ليكى… انا كان عندى انترفيو بوم الاتنين اللى فات .. والحمد لله الانطباع كان كويس … اخيرا فى فرصة انى اسيب صفيحة الزبالة اللى انا شغال فيها .
وشك كان حلو على …قالولى ان الاتش ار هايتصلوا بى قريب ان شاء الله… لا وايه كمان شغلى هايكون مرتبط اكتر بالكمبيوتر والجرافيك اكتر من العملى والورشة والميكانيكا .. الحمد لله …ومرتب افضل ومركز احسن وشركة اكبر … الحمد الله.
وانا هناك واحد من المهندسين الكبار اللى كانو بيعملوا معايا الانترفيو قالى "بس انت ماتنزلش الورشة ..صوتك وطريقة كلامك دى مش بتاعة ورشة" امنت على كلامه طبعا وكنت فرحان اوى… بس هما عاوزين مهارات معينة ببرامج جرافيك مشتغلتش عليها اوى زى الفرى هاندـ بس مش مشكلة هانزله كتب واتعلمه زى ماتعلمت برامج الكمبيوتر كلها… ودى هايشغلنى عنك شوية كمان اليومين اللى جايين…بس عارف انك مبسوطة وفرحانة وهاتستحملى الفترة دى..لانك ملكيش غيرى وانا مليش غيرك.
اسيبك دلوقتى عشان اعيش مع البرنامج … ادعيلى

١٠‏/٠١‏/٢٠٠٧

افضحوووووه

من ساعة ما عرفت بموضوع تعذيب عماد ..ماحولتش اشوف الفيديو لان مجرد قرايتى للموضوع انهارت فى موجة بكاء شديد .. مارحتش شغلى تانى يوم.. فضلت تلات اربع ايام بعدها كاره كل حاجة ماشية فى الشارع على رجلين ::اللى هم البنى ادمين يعنى:: حاسس انهم السبب ..حاسس انهم كانوا ماسكين العصايا مع الكلاب بتوع قسم بولاق ::ولا استثنى نفسى:: المهم انى فررت انى مكتلمش فى الموضوع دة ولا اكتب عنه ولا عاوز افتكره اصلا..

النهاردة عرفت من وائل عباس ودماغ ماك وجريدة الفجر ان الحيوان اللى عمل العملة دى اتعرف وان اسمه اسلام نبيه وان فى حملة لفضحه عشان الناس كلها تعرفه على حقيقته ..حاسيت انى لازم اشارك فى الموضوع دة..لازم الناس كلها تعرف وتحفظ شكله..

فيا مدام يللى دة جوزك...اتفو على جوزك

يا حاج يللى دة ابنك.. انت ربته ازاى

يا كتكوت يا صغير .. عرفت بابا عمل ايه؟

يا ناس يللى ساكنه جنب البيه.. لا تلقوا السلام عليه ولا على اهله. خافوا على ولادكم منه ... ابعدوا بناتكم عنه ..

دعوة الى كل المدونين.. افضحووووووه

ان شاء الله هابداْ حملة ايميلات جديدة... انا ببعت باسم Haneen Jenin

٣٠‏/١٢‏/٢٠٠٦

الليلة عيد..



زى كل عيد …تصيبنى حالة كثيفة من الكأبة ::او للدقة تزيد عندى حالة الكأبة المزمنة اللى انا عايشها:: مش عارف ليه..بالذات فى العيد الكبير..فى البيت اتعودوا منى على كدة..بخاف كتير من الشوارع فى العيد بخاف من منظر الدم ساعة الدبح::البعض يتهمنى بالميوعة وحاجات تانية بتبان فى عنيهم:: مش مهم.
مشهد داخلى..العائلة مجتمعة فى الصالة بيقطعوا ويوزنوا ويتقاسموا جثة الحيوان المسكين…اصوات عالية..عيال فرحانة..خبط ورزع حلل وكفوف ميزان..انا منسحب من دة كله وقاعد فى اوضتى افضفض مع مدونتى الحبيبة ..اسمع اخبار اعدام صدام حسين..اتخنق زيادة..انا مابحبش صدام لانه ديكتاتور قمعى زيه زيى مبارك بالظبط ::بس على الاقل كان معيش اغلب شعبه فبحبوحة من العيش وكان مضطهد الباقى اما حسنى مبارك فمعيش 1% من الشعب اللى هم صحابه وصحاب ابنه ومعارفهم وناسايبهم معيشهم فى بحبـــــــــــــــــــــــــوحة مال وسلطة ومضطهد الباقى اللى هم 99% ..يبقى مين اولى بالاعدام ..اقولك انا مين اولى .. الاولى بالاعدام هو اللى تختارة امريكا وهو اللى مدة صالحية بطاقة خدمته خلصت..
ضايقنى اوى توقيت الاعدام.. اول يوم العيد مع دبح الخرفان والعجول.. مش عارف حسيت بمهانة اوى من التوقيت ::انا قلت انى مابحبش صدام ولا لسة ؟::

عن حالتى فى العيد كنت اتحدث.

وكل سنة وانت طيب وعبيط


٢٢‏/١٢‏/٢٠٠٦

انا مادة فى الدستور..



زى كل يوم اربع بالليل اشتريت الدستور...وبدأت اتصفحه من الاخر كالعادة..وفجأة وبدون سابق انذار..لمحت الصورة دى.. الصورة دى مش غريبة علي... دى صورة موبايلى والخلفيات اللى عليه دى بتاعتى انا اللى مركب الصورة دى وعاملها بيدى...بس انا شفت الصورة دى فين..فين..؟ الصورة دى من مدونتى "واحد من الناس" والكلام اللى كاتبه براء دة علي انا..كل دة وانا لسة واقف فى الشارع جنب بتاع الجرايد..بقيت عاوز اصرخ بعلو صوتى وقول "انت يا استاذ يلى ماشى الكلام اللى مكتوب دة على انا..اه والله.. انت يا كابتن اشتريت الدستور؟ دة جرنال جامد اوى وكاتبين عنى ...انتى يا مدام يللى شايلة العيل..ايه رايك فى الصورة اللى فالجرنال دى..عجبتك..طب ايه رايك فى الفكرة.. كويسة.." استعدت وعي بسرعة قبل الاقدام على هذه العملة لان جنابى كنت بشترى الجرنال وانا ساند على سور...سور ...سور ..مديرية امن القاهرة.

دعوة لاعادة احياء هذه الحملة تانى.

شكراً يا براء

١٧‏/١٢‏/٢٠٠٦

انا بحب مدونتى..



فى خلال وقت قصير وكام تدوينة او كام فضفضة لاقت نفسى بحب مدونتى دى اوى..فعلا اتعلقت بيها جامد..دايما احب ابص عليها حتى وانا متاكد ان مفيش جديد بس مش عارف..حسيت انها حتة منى..يمكن زى بنتى ..بالظبط كدة حاسس انها بنتى..

يمكن اول حاجة خلتنى افكر ادون خواطرى دى هى الوحدة والوحدانيه وكل ما يشتق من لفظة الوحدة اللى انا عايش فيها من زمان..فجأة كدة خت بالى ان عمرى جرى واتسرق منى..اصحابى كلهم (معظمهم)اتجوزا ومعظم هذا المعظم بقى عندهم اولاد وبنات تشغلهم حتى عن نفسهم.. المهم مبقاش فى حد اتكلم معاه عن اللى جوايا ومخافش منه ..مخافش انه يفهمنى غلط او حتى مخافش انه يفهمنى صح!! ..

عاوز اتكلم واصرخ بكل اللى جوايا…مش عاوز اخاف من مشاعرى وافكارى مهما كانت غريبة او عنيفة او رقيقة او متطرفة فىنظر غيرى اللى يمكن مر بظروف غير ظروفى وحياته مستقرة ..(من الاخر مش سايكو زى)

فى الاول كنت عاوز اتشهر (جاى من الشهرة) ويكون لى اصحاب كتير وناس تتابعنى وتحسسنى انى حاجة..شوية شوية لقيت نفسى مش بحاول اجمل كلامى ولا بحاول افلتر افكارى..وشوية شوية لاقتنى صادق اوى مع نفسى هنا..هنا هلاقى نفسى الحقيقية بدون رتوش ولا تجميل ولا اصطناع..بقت هى مرايتى مهما كان شكلها..المهم انها مرايتى انا…بقت صاحبتى وحبيبتى اللى حلمت طول عمرى بيها ومالقتهاش.

ملخص لكل العك والجنان اللى فات:

عرفتى دلوقتى انا بحبك ليه.؟
بحبك لانك شبهى..
بحبك لانك بتصدقينى..
بحبك لانى مابخفش منك..
وبحبك لانك مابتخفيش منى..
بحبك لانى بتفهمينى..
بحبك لاتك عارفه اللى عاوز اقوله من غير ماتكلم..
واهم حاجة..انى بحبك لانى مليش غيرك..

١٥‏/١٢‏/٢٠٠٦

SMS



I’m in mode "0" so stay away.
Don’t talk 2 me.
Don’t touch me.
Don’t look at me.
Just AVOIDE ME.
‘Cause there is no mercy.
U r not the 1 any more.
MOVING 2 MODE "00"
So don’t stay alive.
Pull ur knife out of my heart.
Don’t kiss my blood.
And read my words again
Slowly… slowly.
MOVING 2 MODE "000"


u calling me.
U get I’m wrong number.
U get I’m not exist.
I was always a wrong person.
I was always not exist.
So this number is mine


This massages was sent 2 SHERIF … I feel much better now

 

١٠‏/١٢‏/٢٠٠٦

مصر.. تلك البلاد التى لم تعد صالحة للأستخدام الأدمى



لم اعد اتحملكى ايتها الارض الملعونة …لم اعد اتحمل حتى حروف اسمك بعد ان كنت اذوب عشقاً فيها…
مش قادر اسمع سيرتك اللى بقت مربوطة دايما بهزيمة وبفساد ودعارة وسمسرة وخيانة ..
مش قادر اشوف ناسك اللى مابقوش ناس بالمرة..
مش قادر اسامحك على كل الحب اللى حبتهولك وانتى عارفة انك كنت ام وحبيبة..
مش قادر اسامحك على اهلى وحبايبى اللى غربتيهم جواكى وبراكى ..
مش قادر اسامحك على احلامى اللى ضيعتيها وخلتنى محلمش تانى ابداً..
مش قادر اسامحك على احساسى بالامان اللى ضاع وبقى مكانه احساس فظيع بالخوف من كل حاجة وكل انسان وكل ثانية وكل كلمة وكل نظرة ..
مش قادر اسامحك على كل الحرمات اللى بتنتهك فيكى ..مابقاش فى حاجة عندك ليها حرمة.. حرمة جسدى فيكى منتهكة من اوسخ عسكرى لاوسخ بلطجى وحرمة مالى منتهكة فيكى من اوسخ عسكرى برضو لاوسخ موظف لاوسخ مدرس لاوسخ سواق لاوسخ تاجر لاوسخ مواطن لاوسخ رأيس فيكى..
نسيتينى انى انسان من كتر ما عاملتينى زى الحيوانات..
نسيتينى انى حر من كتر ما استعبدتينى واستعبدتى اهلى واصحابى واحبابى..
نسيتينى طعم الفرح من كتر الحزن اللى عشش فى قلبى ..
كنتى بلد الامن والامان.. بقيتى بلد الخوف والبلطجة والتحرش والسرقة والفساد والتزوير والظلم والقهر والحبس والمنع .. بقت العيشة فى ابعد غابة فيكى يا كرة يا ارضية وسط اكثر قبائل اكلى لحوم البشر وحشية أأمن من الحياة وسط هؤلاء المتحوليين اللى كان اسمهم المصريين..
كنتى ام الدنيا.. بقيتى امنا الغولة اللى اكلت ولادها واحترفت الدعارة والعهر السياسى والاجتماعي والفكري والحرفي..
وحياة دموعى اللى علطول مرغرغة فى عينى ومغرقة سريرى لما افكر فى حالى وحالك.. مش قادر اعيش فيكى.
وحياة هواكى النجس واكلك وزرعك النجس ومايتك النجسة وناسك اللى نجست كل دة.. مش قادر اعيش فيكى.
وحياة كل لحظة حزن وذل فى عيون محمد وجيه اللى رمتيه بقسوتك وفسادك فى بحور الغربة بحثاً عن عمل وكيان وهرباً من واقع لم يعد يتحمله.. مش قادر اعيش فيكى.
وحياة كل لحظة وحزن وضياع فى عيون أسامة. وحياة صحته اللى بيضيعها فى شرب اى حاجة تنسيه انه بنى ادم اصلا ..مش قادر اعيش فيكى.
عارفة.. ممكن اسامحك  على كل دة.. حاجة واحدة مش ممكن اسامحك عليها.. انك قدرتى تخلينى اكرهك.

انتى بقيتى بلد لا تصلح للاستخدام الادمى
 

١٧‏/١١‏/٢٠٠٦

أعلن رفضك لنظام مبارك على موبايلك



الفكرة هى ان كل واحد يحط خلفية للموبايل بتاعه تعبر عن رفضه لنظام مبارك ..انا مطبق الفكرة على موبايلى من ساعة ماجبته… وعلى فكرة هو نفس الموديل اللى فى الصورة الفكرة جامد ومؤثرة جدا .. كل اللى يشوفها ويقولى يابنى انت كدة لو وقفت فى لجنة هاتتحبس على طول ارد واقول انى من غير الموبايل خالص لو شكلى معجبش البيه الظابط هتحبس .. او لو البيه عنده قضايا مش عارف يقفلها برضو
هتحبس . انا كمان حاطط على الموبيايل نغمة جامدة لمنير اللى هى

ايدى النور يا بهيه .. كل العسكر

والخلفيات اهى للى عاوز يحطها على موبايله
 

١٥‏/١١‏/٢٠٠٦

فديوهات بهدلة المصرى داخل اقسام الشرطة



دى لقطات فيديو متصورة بالموبايل داخل اقسام الشرطة المصرية ..
انت وهى وانا وهو فى نظرهم اقل من العبيد والحيوانات ..
وهم والله العظيم شوية مرضى نفسيين ومش ممكن يكونوا طبيعيين ابدا ..
ياللى متجوزة ظابط .. جوزك اهو ..
ياللى ابوك ظابط … بابا اهو … اعرفه على حقيقته
ياللى ابنك ظابط .. ابنك اهو .. انت ربيته ازاى - ملحوظة: معظم الظباط ابوهم اصلا ظباط
وااااااااااااااه يا مصر على اللى بيجرى لولادك.
مع بعض نحاول ننشر الفيديودة عشان الناس كلها تعرف ان الشعب فى جزمة الشرطة
ممكن تنزل الاربع كليبات دول من على الموقع

http://members.lycos.co.uk/gawalsu/