١٥‏/٠٢‏/٢٠٠٧

فضفضة 1


كل ماجى اكتب امسح كل اللى كتبته وارجع اقعد من حزنى تانى ..كذا مرة اكتب وارغى وافضفض واعيط لغاية ماقلبى يوجعنى بجد وبعدين اروح ماسح كل اللى كتبته وارجع كما كنت .
مخنووووق اوى اليومين دول مش طايق حد يكلمنى.. عنيا مدمعة طول الوقت .حزنان على نفسى اوى ..احساس الوحدة بيقتلنى . عمرى ماتمنيت يكون لى واحدة معايا تحبنى وتفهمنى وتخاف علي زى اليومين دول ..عمرى ما عرفت بنت ولا حتى اتكلمت مع واحدة ..الانثى بالنسبة لى حاجة كبيرة اوى مفتقدها اوى .. طب خلاص بلاش الموضوع دة انا مابحبش اتكلم فيه.
اللى جاى دة لقطات من حاجات دايما شاغلة دماغى ومابتفرقش بذات دلوقتى ..
::كيف تنظر فى عين امراة انت تعرف انك لا تستطيع حمايتها:: عمنا أمل دنقل
::السلام خيار استرتيجى:: كبار تجار الخيار
::القالك حد:: انغام
::اتخنقت..انا ماوصلتش لحاجة من اللى حلمت بيه…سوء اختيار دة ولا سذاجة ولا ايه..رجعت للصفر ..من مكان مابدأت.. اتخنقت:: محمد محى
::لا مال لاحد إن جاع احد:: مش عارف قريتها ولا سنعتها فين .
:: الحقيقة أن المواطن المصري قد تغير كثيرًا جدًا، وما أريد قوله هو أن هذه الحكومة هي الإفراز الطبيعي لهذه الحالة.:: د/ أحمد خالد توفيق
:: مصر بقت قاسية اوى على ولادها.:: هند صبرى من فلم عمارة يعقوبيان
:: لما ابقى عاوز اكل ومش لاقى واما ابقى عاوز البس ومش لاقى ولما ابقى عاوز اشتغل ومش لاقى ولما ابقى عاوز احب واتجوز ومش لاقى يبقى لازم اشم عشان انسى انى بنى ادم اصلاً.:: شخصية الشاب المسطول من مسرحية يا غولة عينك حمرا…على فكرة كان مشهد مؤثر جدااا بيخلينى ابكى بشدة بعده.
:: لم أعد فادراً على انجاز شئ, اغتالوا همتى ولربما اشتركت معهم فى هذه الجريمة بتهاونى وقلة حيلتى وصدق نيتى, انا رجل من رجال هذا العصر تمسك بمثاليات لم يعد هناك من يؤمن بها وكلفنى هذا الكثير وفقدت كل شئ سلبونى كل ما املك, مثالياتى واحلامى, تحطمت كلها على صخور الواقع المقزز المخزى, لميتركوا إلا اشلاء رجل, وحطاماً لشئ على ما يبدو كان يسمى يوماً ما بالإنسان, هل لدينا ما يعننا على الاستمرار؟ هل نملك اى من مقومات المقاومة أو التضحيات الواجب تقديمها لدرء الأيادى السوداء المستمرة فى افسادنا بالقوة لنتحول إلى مسوخ تمشى على قدمين؟:: القارئ ادهم حمزة فى رسالة الى جريدة الدستور
:: انا عن نفسي نفسي اهاجر علشان ولادي يطلعو يحبو مصر مش يعيشو فيها ويكرهوها:: مدونة الكابيتشينو للجميع
::مش لو كان لى واحدة فى حياتى كنت زمانى مرمى فى حضنها دلوقتى وبعيط واشكي لها من غير ما اخاف تفهمنى غلط ولا اخاف تفهمنى صح.:: انا بكلم نفسى
::انا بكره رقم الواحد لانه بيفكرنى بى:: انا
::بابا طلق ماما:: من ساعة ما اختى الصغيرة قابلتنى بالكلمة دى وهى بفتحلى الباب وبيتعيط وانا الزمن اتجمد عتد اللحظة دى بالنسبة لابويا وامى ..رغم انه رجعها تانى يوم الا ان الموضوع كان منتهى بالنسبة لى ..انا بكرهم هما الاتنين بذات هو .. بتجيلى حالة عصبية لمجرد سماع صوته .. اليوم دة كان اكبر شرخ فى حياتى ..انا قبل اليوم دة مش انا ابدا بعده..كلمة اسرة وبابا وماما بتعصبنى ..كل اتنين بيتجوزو مش بيتخيلو انهم بيتخكمو فى مصير ومستقبل ولادهم بشكل مباشر و عميق..انا شايف ان معظم الاباء ولامهات هم جناة ويستهالو المحاكمة ..ساعات الاقى حد يقولى مش هم دول اللى صرفو عليك وربوك ومش عارف ايه . والفلم دة كله ..بس انا شايف ان دة شئ طبيعى وبديهى كمان ومهواش منة او حسنه منهم.. كان نفسى مايكونش دة كلامى ولا دى مشاعرى بس هو دة انا من جوا..
ايه دة انا زودتها اوى النهاردة انا نسيت نفسى وانا بتكلم معاكى ..مكنتش متخيل انى هاتكلم فى المواضيع دى ابدا..
رجعت للصفر من مكان مابدات

هناك ٣ تعليقات:

الحلم العربي يقول...

فضفضتك أثرت فيه أوي خصوصا كلامك على بابا و ماما ...بس كنت عايزة اقولك على حاجة: احنا متدلعين اوي ساعات لما الاب يطلق الأم ده بيكون احسن من أنه يعيش معاها و هو بيكرهها او هي بتكرهه و الحمد لله انهم رجعوا لبعض...اذا عشنا حياتنا نحكم على الناس بأفعالهم يبقى مش هيكون حوالينا اي حد نحبه و يحبنا لازم نسامح بعض شوية و لازم ندخل جوة الحياة اكتر علشان ما نعيشش لنفسنا لأن اللى بيعيش لنفسه بيموت لوحده....ربنا معاك

واحد من الناس::طارق:: يقول...

الحلم العربى..
متشكر جدا على كلامك
عجبنتى اوى
"اذا عشنا حياتنا نحكم على الناس بأفعالهم يبقى مش هيكون حوالينا اي حد نحبه و يحبنا لازم نسامح بعض شوية و لازم ندخل جوة الحياة اكتر علشان ما نعيشش لنفسنا لأن اللى بيعيش لنفسه بيموت لوحده"

دة اللى بحاول اعمله دلوقتى فعلا

تحياتى

غازى يقول...

تعرف ... انت كلامك اثر فيا جامد بس مش عارف اقوللك إيه لأنى انا كمان باعانى من مشكلة تشبه مشكلتك كتير
ومشكلتى بقى يا سيدى .. إنى ليا اصحاب كتييييييييير قوى بس مباعرفش افضفض مع أى حد فيهم لدرجة إنى باحس إنى هانفجر من الكبت اللى جوايا ... وغير كده كمان .. كنت باحب واحده من زمااااان وهيا كانت بتحبنى ... لكن فى لحظة مالقيتهاش ... من سنة ونص وانا مش عارف عنها اى حاجة .... هى فين دلوقتى ... لسه فاكرانى زى مانا فاكرها ... لسه عارفة اننا باحبها ولا مفكرانى نسيتها ؟؟؟ كل الأسئلة دى وغيرها كتير وكتير بيفجر دماغى ...
وطبعا مع عدم وجود حد تفضفض له بتحس إنك وحيد على سطح القمر ... لا حوليك ناس ولا بشر ولا حتى كلب تهوهو معاه ..
عشان كده أنا حاسس بيك ... وحاولت إنى احل موضوعى بطرق كتييييير ... منها دخولى العالم البلوجرز ... من غير اى نية بس فكرت ان ده هايريحنى بس اتضح لى ان العالم ده بيزود الهم ومش بيعالج حاجه .. واخيرا انضميت لعالم الكابتشينو .. والجوانات ... واوعى تفتكر إن دى دعوة منى عشان تجرب العالم ده لأنى أحب اقولك إنه برضه ماحلش حاجة خالص .. وفكرت انى انام لفترات طويلة ... بس ده برضه اثر على شغلى وخلانى عالحديدة لفترات طويلة ... يعنى برضه ماحلش حاجة .. واخيرا فكرت إنى ما افكرش خالص .... لكن طلعت لى مشكله مش قادر احلها وهيا ازاى اوقف عقل عن التفكير المشكله دى خلتنى افكر فى حلها كتيييييييييييير ... مما ادى إلى طريق مسدوووووود .. ومافيش ولا مشكله اتحلت ...
عشان كده احب ابشرك ان احنا
ضايعييييييين .. ضايعييين



واللى يشوف بلاوى الناس ...