حركة تنقلات
عندى خبرين ..
الاول. انى معزل من شغلى القديم والحمد لله اتقبلت فى الشغل اللى كنت اتكلمت عليه قبل كدة.. بعد 3 انترفيوهات الحمد لله.. شغل افضل واحسن وحاجة بحبها اكتر وممكن اتميز فيها مش بس ابقى مجرد ترس فى ماكنة مابحبهاش.. مرتب افضل .. يعنى الحمد لله ..هابدأ معاهم من اول شهر 5 او من نص 4 . خايف من مسؤليات الشغل دة لانها كبيرة .. مش عارف ليه دايما اخاف من الخطوة الجاية .. دايما مش واثق فى نفسى .. خايف اتكلم مع الناس لحسن مايقبلونيش .. خايف خايف اقول انا بحب لحسن اترفض .. خايف وخلاص .
الخبر التانى .. انى هاعزل من المدونة القديمة اللى على بلوجسم وانقل هنا على بلوجسبوت .. يعنى حتى ابقى قريب من الشغل الجديد :) ..
كنت متردد اوى فى القرار دة لانى متعلق بمدونتى اوى ..اقنعتها وقولتلها انى مش هاسيبك هنا ..لا انا هاخدك ونروح حتة تانية ..يعنى مجرد هانعزل لسرفر تانى ..انتى عارفة انى مقدرش حتى افكر انى اسيبك ..مانتى عارفة ماليش غيرك ..بجد
هناك ٢٢ تعليقًا:
انا اول واحد تعل علي البوست الجديد اللي في المدونة الجديدة
كون نقلت هنا او بقيت انت هناك فانت في كلا الحالات طارق اللي عرفناه
بالنسبة لشغلك الجديد فمبروك وان شاء الله ربنا هيكرمك يارب فيه وتثبت نفسك
بالنسبة انك خايف فاوعي تخاف يا طارق
واجه نفسك اللي جاي هيبقي ارحم بكتير من اللي فات
واجه اللي بتحبه
ولو بتحب قول
علي الاقل هتوصل للراحة
سواء عرفت انها بتابدلك وسواء عرفت انها مش ليك
في كلا الحالات هتحس براحة
اخرج من وحدتك بالمواجهه
ومش تخاف مش هيحصل اكتر من اللي حصل
وربنا يوفقك يارب
طارق الف مبروك على الشغل الجديد
كان نفسى اكون اول واحد يعلق عندك بس معلش انت عارف انا كنت مسافر
عايز اسمع اخبار جديدة عنك ماشى
سمراء ازيك...
الله يبارك فيك ياستى ..وان شاء الله انا خلال الاسبوعين اللى بجهز فيهم ورقى هذاكر كل اللى ناقصنى وكل اللى نسيته .. لانى عاوز اثبت نفسى فى الشغلانة دى ..عاوز اتميز واطلع اللى عندى .
بالنسبة للموضوع التانى .. انا بحاول بس مش باساهل يا سمرا.. بكلمة واحدة ممكن تلاقى نفسك فى الجنة او فى النار
محمد .. حبيبى ازيك
والله يبارك فيك ... ومن غير حتى ماتباركلى انا عارف انك فرحان لى..ربنا يخليك لى يا محمد
اووبس
كان نفسى أكون أنا أول واحد يعلق لكن معلش،خيرها فى غيرها و انما الاعمال بالنيات
سواء على البلوجسم أو البلوج سبوت.أنت منورنا ببووستاتك على طول
مبروك وربنا يكرمك
تحياتي
ابو ضحى الجميل..
ربنا يكرمك ..والله انت اللى منورنى
ابن ناصر ..
الله يبارك فيك ومتشكر جدا على الزيارة والاهتمام
مبروك يا طارق علي الشغل الجديد وإن شاء الله هتثبت وجودك فيه ما دام بتحبه أما شعورك بالخوف فده طبيعي لأي حد داخل علي خطوه جديده... بس لازم نغلب الخوف ده لأنه لو غلبنا يبقي مش هنقدر نعمل أي حاجه صح في حياتنا.. وهقولك زي سمراء النيل واجهه يا طارق... والله فعلا المواجهه بتريح..هتعرفك إنت فين بالظبط في خريطة اللي قدامك ... و علي هذا الأساس هتعرف ترسم خريطك ..فاهمني يا طارق
و بخصوص المدونه فهي بالنسبه لي التي أعرفها ... لم أدخل أبدا علي المدونه القديمه..يعني عرفتك علي المدونه دي و متبعاك عليها.. وكده كده هي هي.. ولا إيه
ربنا معاك
سلااااااااااااامات يا طارق
طارق أبكيتني لما قريت كلامك علي إرتباطك بمدونتك وكلامك فيها عن وحدتك وإنك مش لاقي أصحاب بعد ما إتجوزوا و ولادهم شغلوهم وعمرك اللي إتسؤق منك... لاقيت نفسي رحت جري أشوف سنك في الوضع الكامل ليك... لاقيته 28... إنت لسه في مقتبل مقتبل العمر
ربنا يوفقك
انت يا عم ياللي بتحب في المدونة انت
مش ناوي تغير ام البوست الكئيب دة بقي
شغل وباركنالك
عايز ايه تاني بقي
شايف حتي ريري
بتقولك زي ما بقولك
واجهه يا طارق وابقي قولي ايه النتيجة
ومش تخاف مش يمكن تلاقي نفسك في الجنة
ولا تبقي في النار ولا حتي عند كشك السجاير
وربنا كريم يا ابني
ياخد بايدك وبايدي وبايد كل اللي زينا
بس انت قول يارب
وغير بقي البووووووووووست دة
لاجي افجر نفسي في مدونتك واوديك في داهية
الف مبروك يا طارق
ربنا يعينك علي مسؤليتك الجديدة
وخلي باللك من عقارب الشغل الجديد
تحياتي
ويجعلوعااااااااااااااااااااااااااامر
هو انت واحد من الناس غير واحد من الناس اللي هو واحد من الناس؟
ها
وللا ايه
الف الف الف مبروك على كل حاجة كويسة حصلتلك
مش بس الشغل ونقل المدونة
ربنا يسعد ايام الجميع
reri
الله يبارك فيكى يا ستى وانا هاخد بنصحيتك
وفعلا انا بحب مدونتى اوى ..لانها هى اللى لى .. بحس انى مقصر فى حقها لما بتاخر عليها
نورتنى الشوية دول
سمراء ..
اه بحب فى مدونتى هانكر يعنى ..ومقدرش طبعا الغى بوست منها
سمسم
الله يبارك فيك ..وربنا يستر
نبض اسكندرية
الله يبارك فيكى يا ستى ونورتنى
نوارة هانم ...
يا ستى انا واحد من الناس واسمى طارق ... انا عارف ان الناس اللى بقت واحايد من الناس كترت .. بس هانعكل ايه
اول زيارة ليا هنا
مبروك على التجديد مع انى لسه ضيفه جديده هنا
مبروك المدونة على العزال
ومبروك الشغل الجديد
شد حيلك فيه عشان تثبت نفسك اكتر واكتر
ومتضايقش من شغور الخوف ده
الخوف ده شئ صحى خصوصا لو فى بداية اى خطة جديدة وبالأخص لو الخطوة دى فى طريق تحقيق هدفك كمان
سيبها على الله وثق فيه وربنا يوفقك ويكرمك
اللهم امين
مبروك ياطارق على الشغل الجديد وبجد الخوف من مرحلة جديدة ده شىء طبيعى لانك بتكون خايف من المسؤلية الجديدة بس ربنا يوفقك وان شاء الله هتقدر تكون قد المسؤليه وتقدر تواجه اللى جاى كله
ومبروك على نقلك على البلوج سبوت
المهم تكون مدونتك منورة على طول كدا
وعايزين جديد
تحياتى
Esmeralda ..
ان شاء الله مش تكون اخر زيارة
والله يبارك فيكى..والله يعينك على موضوع الميكروباص دة ..مش بكره حاجة فى الدنيا قد الميكروباصات وسواقينها عشان كدة حتى مش عرفت اكمل قراية الموضوع.
إنسانة...
الله يبارك فيكى .. وربنا يسهل ان شاء الله ومتكر جدا على التشجيع والكلام الجميل .. واللهم امين
malak..
متشكر جداوربنا يكرمك ..
ويا ريت اشوفك هنا على طول ...كفاية ان اسمك بيفكرنى باحب كائن بشرى على وجه الارض لقلبى .. ملك بنت اختى ..
طب استنى والله لوريهالك
هنـــــــــــــــأ
السلام عليكم
جزاك الله خيرا اخى على الموضوع الجميل
نفعنا الله واياك بكل خير ونفع بنا العباد
تحياتى لجهدك الطيب
صور مشبات
http://shomane.blogspot.com/
http://mchabat.3abber.com
شركة تنظيف سجاد بالدمام
شركة عزل اسطح بالدمام
شركة الصفرات لتنظيف المنازل
إرسال تعليق